Mumbai : ‘तेजस’ एक्सप्रेसमध्ये वारंवार बिघाड; ३ ते ६ तास उशीर होत असतानाही भाडे मात्र प्रीमियम, प्रवाशांचा संताप वाढतोय

Mumbai : वेगवान आणि आरामदायी सुविधांसाठी ओळखल्या जाणाऱ्या छत्रपती शिवाजी महाराज टर्मिनस ते मडगाव तेजस एक्स्प्रेसमधील असुविधांमुळे प्रवासी त्रस्त आहेत. सातत्याने होणारा विलंब, बंद असलेली ‘इन्फोटेनमेंट’ सुविधा आणि वाढीव भाडेदर यामुळे तेजस केवळ कागदावरच प्रीमियम ट्रेन ठरत आहे. ‘चेअर कार’ असल्याने प्रवास बसून करावा लागतो. यामुळे गाडीत शयनयान डब्यांची रचना करावी किंवा तेजसऐवजी वंदे भारत चालवावी, अशी मागणी प्रवाशांकडून करण्यात येत आहे.

गाडी क्रमांक 22119/22120 मुंबई-मडगाव तेजस एक्स्प्रेस सीएसएमटीहून सकाळी 5.50 वाजता सुटते आणि मडगाव येथे दुपारी 3 वाजता पोहोचते. मडगावहून परतीचा प्रवास दुपारी 3.35 वाजता सुरू होऊन सीएसएमटीत रात्री 12.30 वाजता पूर्ण होणे अपेक्षित आहे. मात्र सातत्याने तेजस एक्स्प्रेस तीन ते सहा तास विलंबाने धावत आहे. यामुळे मध्यरात्री पोहोचणारी तेजस पहाटे पोहोचत असल्याने प्रवाशांच्या अडचणीत भरच पडत आहे.

Budget 2026 : सर्वसामान्य आणि छोट्या व्यापाऱ्यांना मोठा झटका; सरकारच्या एका निर्णयामुळे खिशावर पडणार थेट भार

गाडीत ‘चेअर कार’ डबे असल्याने ज्येष्ठ नागरिकांसह, महिला प्रवाशांना विलंबाने पूर्ण होणाऱ्या प्रवासात मनस्ताप सहन करावा लागतो. दुसरीकडे गाडीतील ‘इन्फोटेनमेंट’ सुविधा बंद करण्यात आली आहे. असुविधा असूनही गाडीसाठी ‘प्रीमियम’ दराने प्रवासी भाड्याची आकारणी होते. यामुळे प्रवाशांमधून नाराजी व्यक्त होत आहे.

सततच्या विलंबामुळे या गाडीच्या विश्वासार्हतेवर प्रवाशांचा पूर्ण विश्वास उडाला आहे. ‘‘तेजस’ गाडीला ना वेग उरला, ना वेळेची शिस्त. धक्कादायक बाब म्हणजे, या गाडीच्या वक्तशीरपणाची जबाबदारी नेमकी कोणाची, याबाबत रेल्वे प्रशासनच मौन बाळगत असल्याने तेजस एक्स्प्रेसचा वाली कोण,’ असा प्रश्न कोकण विकास समितीचे सदस्य अक्षय महापदी यांनी उपस्थित केला आहे.

तेजस एक्स्प्रेसमध्ये शयनयान आसनांचे डबे जोडावेत किंवा तेजस एक्स्प्रेसऐवजी वंदे भारत गाडी चालवावी. कोकण रेल्वेवरील मर्यादित क्षमता, देखभालीसाठी सुरू असणारे ब्लॉक अशी अपरिहार्य कारणे असली, तरी जादा भाडे भरून प्रवाशांची बैठ्या आसनांमुळे होणाऱ्या त्रासातून सुटका करावी, अशी मागणी प्रवासी संघटनांनी केली आहे.