Speeding Cement Tanker Overturns, Crushing Biker to Death.

पुणे: शहरातील सिंहगड रस्ता परिसरातील नवले ब्रिज परिसरात अपघातांची मालिका थांबण्याचे नाव घेत नाही. मंगळवारी (१० जून २०२६) मध्यरात्री साडेबारा वाजण्याच्या सुमारास नवले ब्रिजखालील पल्स हॉस्पिटलसमोर एक भीषण अपघात घडला. भरधाव वेगाने धावणारा सिमेंट टँकर अचानक पलटी होऊन दुचाकीवर कोसळल्याने एका तरुणाचा जागीच दुर्दैवी मृत्यू झाला. या संपूर्ण घटनेचे सीसीटीव्ही फुटेज समोर आले असून, अपघाताची भीषणता पाहून नागरिकांमध्ये हळहळ व्यक्त होत आहे.

मिळालेल्या माहितीनुसार, रामेश्वर मच्छींद्र उगले (वय ३१, सध्या रा. वाघजाईनगर, कात्रज, पुणे; मूळ रा. सांगवी, ता. हाजीपूर, जि. बीड) असे मृत्यू झालेल्या दुचाकीस्वाराचे नाव आहे. याप्रकरणी यश वैजनाथ कराड (वय २१, रा. शिवाजीनगर, पुणे) यांनी नऱ्हे पोलीस ठाण्यात फिर्याद दिली आहे. त्यानुसार टँकर चालक गोरख लक्ष्मण रणसुरे (वय ५०, रा. लोणी काळभोर, पुणे) याच्याविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी यश कराड आणि त्यांचा मित्र रणजित कराड हे मध्यरात्रीच्या सुमारास पल्स हॉस्पिटलसमोर उभे होते. त्याचवेळी नऱ्हे गावाकडून भरधाव वेगाने येणाऱ्या सिमेंट टँकरवरील चालकाचे नियंत्रण सुटले आणि टँकर अचानक पलटी झाला. याच क्षणी वडगाव ब्रिजच्या दिशेने दुचाकीवरून प्रवास करणारे रामेश्वर उगले हे टँकरच्या कचाट्यात सापडले. पलटी झालेला अवजड टँकर थेट त्यांच्या दुचाकीवर आणि अंगावर कोसळल्याने त्यांचा जागीच मृत्यू झाला.

या अपघातात अन्य काही जण जखमी झाले असून दोन्ही वाहनांचे मोठ्या प्रमाणात नुकसान झाले आहे. नऱ्हे पोलीस भारतीय न्याय संहिता (BNS) २०२३ तसेच मोटार वाहन कायद्यान्वये गुन्हा दाखल करून पुढील तपास करत आहेत. दरम्यान, नवले ब्रिज परिसरात वारंवार होत असलेल्या अपघातांमुळे नागरिकांनी प्रशासनाकडे कायमस्वरूपी उपाययोजनांची मागणी पुन्हा एकदा जोर धरली आहे.