Pune : पुण्यात 56 बोगदे, एलिव्हेटेड कॉरिडॉर... येरवडा-कात्रज 54 किलोमीटरचं भूमिगत जाळं; शहरात मोठी योजना

Pune : पुणे शहरात दररोजच्या वाहतूककोंडीला नागरिक त्रस्त झाले आहेत. वाहतूककोंडीतून नागरिकांना दिलासा देण्यासाठी प्रशासनाकडून प्रयत्न सुरू आहेत. त्यापैकीच एक भाग म्हणजे राज्य सरकारने महत्वाकांक्षी भूगर्भीय वाहतूक प्रकल्प राबवण्याचा निर्णय घेतला आहे. हा बोगदा येरवडा–कात्रज मार्गावर तयार होत आहे. भूमिगत बोगद्यामुळे नागरिकांना मोठा दिलासा मिळणार आहे.

उपमुख्यमंत्री अजित पवार यांनी नुकतंच सांगितलं, की पुण्यात तब्बल 56 बोगदे बांधण्यात येणार असून, यामुळे शहरातील वाहतूक व्यवस्था ऐतिहासिक बदल अनुभवणार आहे. येरवडा–कात्रज बोगदा फक्त एक बोगदा नसून, शहराच्या उत्तर ते दक्षिण भागांना जोडणाऱ्या 54 किलोमीटरचं भूमिगत जाळं असेल. यात जगताप डेअरी, सिंहगड रोड, पाषाण, कोथरूड, औंध, संगमवाडी आणि खडकी सारख्या प्रमुख भागांचा समावेश आहे. भूमिगत मार्गामुळे सध्याच्या रस्त्यांवरील ताण कमी होईल आणि रिंगरोडशी जोडलं जाणारं हे जाळं महामार्गावर जाणारी वाहतूकही सुलभ करेल.

Maharashtra Dry Day : तळीरामांसाठी महत्त्वाची बातमी: महाराष्ट्रात पुढील ४ दिवस दारू दुकाने बंद, कारण जाणून घ्या

उपमुख्यमंत्री अजित पवार म्हणाले, “पुण्यातील 32 प्रमुख रस्त्यांवर वाहतूक दीड ते अडीचपट अधिक आहे. या भूमिगत बोगद्यांमुळे वाहतूक सुधारेल, तसंच नागरिकांचा वेळ आणि ईंधनाची बचत होईल.” त्याचबरोबर, शहरात 23 उड्डाणपूल बांधण्यात येणार आहेत, त्यापैकी 8 काम सुरू आहेत. काही ठिकाणी एलिव्हेटेड कॉरिडॉर बांधण्याचा निर्णयही घेण्यात आला आहे, ज्यामुळे खाली रस्ता राहील आणि वरून मेट्रो मार्ग किंवा वाहतूक कॉरिडॉर जाणार आहे.

पूर्ण प्रकल्पाचा अंदाजे खर्च 32000 कोटी रुपये आहे, जो राज्य सरकारकडून निधी दिला जाईल. प्रकल्पाचं प्राथमिक डिझाइन आणि अहवाल पूर्ण झाला असून, मुख्यमंत्री कार्यालयाकडूनही हिरवा कंदील मिळाला आहे. पुण्यातील 40 टक्के वाहतूक कोंडी रिंगरोडच्या पूर्ण होण्यावर कमी होईल अशी अपेक्षा आहे. विशेष तज्ज्ञांचं म्हणणं आहे की, भूमिगत बोगदे रस्त्यांवरील वाहतुकीला गती देण्यास फायदेशीर ठरणार असून शहरातील प्रदूषणातही घट होईल.

नागरिक आणि वाहनचालकांसाठी हा प्रकल्प फायदेशीर ठरेल, तसंच शहराचे ट्रॅफिक जाम दूर करण्यासाठी याला स्मार्ट सिटीच्या उद्दिष्टात महत्त्वाचा मानलं जात आहे. पुणेकर आता या भूमिगत बोगद्याची वाट पाहत आहेत, ज्यामुळे कात्रज घाटातील कोंडीला शेवटचा निरोप मिळेल आणि शहरातील वाहतूक प्रवाह सुरळीत होईल. हे प्रकल्प पूर्ण झाल्यानंतर पुणे फक्त एक शहर नव्हे, तर आधुनिक वाहतूक व्यवस्थेचे आदर्श म्हणून उभं राहील.