Pune : सोलापूर महामार्गावरील मोठी मोहीम; हजारो चौ.फुट अवैध बांधकामांविरुद्ध प्रशासनाची धडक कारवाई

Hadapsar

Pune : हडपसर येथील हडपसर-मुंढवा क्षेत्रिय कार्यालय हद्दीत राष्ट्रीय महामार्ग विभाग, पालिकेचा बांधकाम व अतिक्रमण निर्मूलन विभागाकडून सोलापूर महामार्गासह मांजरी फाटा चौकातील अतिक्रमणांवर संयुक्त कारवाई करण्यात आली. या कारवाईत दोन हजार चौरस फूट आरसीसी बांधकामासह ७ हजार ८०० चौरस फूटाचे शेड जमीनदोस्त करण्यात आले. आज सकाळी साडेदहा ते दुपारी चार वाजेपर्यंत ही कारवाई झाली. सोलापूर महामार्ग व १५ नंबर बस स्थानक येथे रस्ता रुंदीकरण, फ्रंट तसेच साइड मार्जिन व सात स्टॉलवर कारवाई करण्यात आली. याशिवाय एक हातगाडी, सिलेंडर, चार काउंटर, दहा पथारी तर अकरा इतर वस्तू या कारवाईत जप्त करण्यात आल्या.

Pune : फॉर्च्युनरमध्ये बिझनेसमनची हत्या; सूत्रधार पुण्याचा माजी नगरसेवक असल्याचा धक्कादायक आरोप, ताम्हिणी घाटात प्रकरणाला भीषण ट्विस्ट

कारवाईसाठी महाराष्ट्र सुरक्षा बलाचे १३ जवान, २ पोलिस कर्मचारी, मध्यवर्ती (भरारी) पथक व परिमंडळ ४ कडील कर्मचारी, बिगारी सेवक, सात वाहने वापरण्यात आली. क्षेत्रिय अतिक्रमण निरीक्षक संजय जाधव, राकेश काची, सहायक निरीक्षक कुणाल मुंढे, साईनाथ निकम, अभिलाष कांबळे, वामन सुद्रिक, माधव बहिरम तसेच, मध्यवर्ती पथकाचे सहाय्यक निरीक्षक राकेश सोनवणे, निशांत सावंत, तुषार कदम, बांधकाम विकास विभागाचे कनिष्ठ अभियंता सागर सपकाळ, राष्ट्रीय महामार्ग विभाग उपअभियंता राहुल कुलकर्णी, शाखा अभियंता अतुल सुर्वे यांच्या उपस्थितीत ही कारवाई झाली. उपआयुक्त सोमनाथ बनकर, सहाय्यक उपआयुक्त रमेश शेलार, सहाय्यक आयुक्त रवी खंदारे यांच्या मार्गदर्शनाखाली यापुढे देखील वारंवार व नियमितपणे कारवाई करण्यात येणार असल्याचे अतिक्रमण निरीक्षक राकेश काची यांनी सांगितले.