Pooja Khedkar: लेकीमुळे बापही गोत्यात; खेडकरांच्या संपत्तीची चौकशी होण्याची शक्यता, एसीबीकडे तक्रार अर्ज दाखल

Pune  : प्रशिक्षणार्थी अधिकारी (आयएएस) पूजा खेडकर यांचे वडील दिलीप खेडकर यांची बेहिशेबी मालमत्ता गोळा केल्याप्रकरणी चौकशी होण्याची शक्यता आहे. या प्रकरणी पुणे लाचलुचपत प्रतिबंधक विभागाला (एसीबी) तक्रार अर्ज प्राप्त झाला असून, पुणे एसीबीने तो अर्ज राज्य लाचलुचपत प्रतिबंधक विभागाकडे पाठविला आहे; तसेच चौकशीची परवानगी मागितली आहे.

पूजा खेडकर यांनी पुणे जिल्हाधिकारी कार्यालयात केलेल्या अवास्तव मागण्या आणि त्यासाठी केलेल्या कृतीमुळे त्या चर्चेत आल्या. पूजा खेडकर यांना ‘आयआरएस’ ही पदवी मिळत होती. मात्र, ‘आयएएस’ पदवी मिळविण्यासाठी ओबीसीसह नॉन क्रिमीलेअर आणि बहुविकलांग अशी प्रमाणपत्रे त्यांनी सादर केली आहेत. दुसरीकडे खेडकर यांच्या आई-वडिलांनी निवडणूक आयोगाला दिलेल्या प्रतिज्ञापत्रात ४० कोटींची संपत्ती दाखविली आहे. पूजा खेडकर यांचे एका वर्षाचे वैयक्तिक उत्पन्न ४३ लाख रुपये असल्याचे दाखविले आहे. त्यावरून खेडकर यांच्या मालमत्तेबाबतही अनेक प्रश्न उपस्थित करण्यात आले आहेत.

Mumbai Underground Metro : मुंबईची पहिली अंडरग्राउंड मेट्रो आली; कधीपासून धावणार, मार्ग आणि स्थानकं कोणकोणती?

लाचलुचपत प्रतिबंधक विभागाने आता या प्रकरणात उडी घेतली आहे. खेडकर यांच्या बेहिशेबी मालमत्तेप्रकरणी पुणे लाचलुचपत प्रतिबंधक विभागाकडे तक्रार प्राप्त झाली आहे. त्या तक्रारीची दखल घेण्यात आली आहे, अशी माहिती वरिष्ठ अधिकाऱ्याने दिली.

दरम्यान, दिलीप खेडकर यांची बेहिशेबी मालमत्ताप्रकरणात नाशिक लाचलुचपत प्रतिबंधक विभागाकडून यापूर्वीच उघड चौकशी सुरू केली आहे. त्यामुळे पुणे लाचलुचपत प्रतिबंधक विभागाने नाशिक विभागाकडे हा अर्ज चौकशीसाठी वर्ग करावा किंवा पुणे विभागाला त्या अर्जाची स्वतंत्र चौकशी करण्यासाठी परवानगी मिळावी, अशी परवानगी मागितली आहे.

पूजा खेडकरांचा तक्रार अर्ज

वादग्रस्त प्रशिक्षणार्थी पूजा खेडकर यांनी पुण्याचे जिल्हाधिकारी सुहास दिवसे यांनी छळवणूक केल्याची तक्रार वाशिम पोलिसांत दाखल केली आहे. दरम्यान, हा प्रकार पुण्यातील असल्यामुळे पुढील चौकशीसाठी तो तक्रार अर्ज पुणे पोलिसांकडे वर्ग करण्यात आला आहे. त्याची चौकशी आता पुणे पोलिस करणार असल्याची माहिती वरिष्ठ पोलिस अधिकाऱ्यांनी दिली आहे. मंगळवारी (१६ जुलै) रात्री वाशिम पोलिस पुण्यात दाखल झाले होते. पुणे पोलिसांनी पूजा खेडकर यांना समन्स पाठवून जबाबासाठी बोलावले आहे.