Pune Crime: हातोडा घेतला अन् थेट आचाऱ्यावर वार, नाक फुटलं अन्... पुण्यात लेबर कॅम्पमध्ये हादरवणारी घटना

Pune : जेवणाची चव चांगली न लागल्याने संतापलेल्या कामगाराने हातोड्याने केलेल्या बेदम मारहाणीत आचाऱ्याचा मृत्यू झाल्याची भंयकर घटना पुण्यामध्ये घडली आहे. ही घटना रविवारी दुपारी अडीच वाजताच्या सुमारास उंड्री परिसरातील मिलेनियम लेबर कॅम्प येथे घडली.

शुभम शास्त्री सरकार (वय ६३, रा. पश्चिम बंगाल) असे मृत्यू झालेल्या व्यक्तीचे नाव आहे. या प्रकरणी कमल नारायण मार्डी (वय ४९, रा. जियापूर, पश्चिम बंगाल) याच्यावर गुन्हा दाखल करून त्याला अटक करण्यात आली आहे.

जेवणाची चव आवडली नाही म्हणून थेट हातोड्याने मारहाण

पोलिसांनी दिलेल्या माहितीनुसार, उंड्री भागात एका कन्स्ट्रक्शन साइटवर लेबर कॅम्प आहे. या कॅम्पमध्ये तेथील कामगार राहतात. कमल मार्डी हा कामगार आहे, तर शुभम सरकारवर कामगारांसाठी जेवण करण्याची जबाबदारी होती. रविवारी शुभम सरकार यांनी कॅम्पमध्ये सर्वांसाठी जेवण बनविले होते. त्याची चव न आवडल्याने मार्डी आणि सरकार यांच्यात वादावादी झाली. यातूनच आरोपी मार्डी याने हातोड्याने शुभम सरकार यांना मारहाण केली.

Ladki Bahin Yojana : ऑफलाइन अर्ज अधिक; 'लाडकी बहीण'साठी बारामती, आंबेगाव, जुन्नरमधून प्रतिसाद

हातोडीचा एक घाव सरकार यांच्या नाकावर बसला. यात ते गंभीर जखमी झाले. या घटनेची माहिती मिळताच कोंढवा पोलिसांनी घटनास्थळी धाव घेतली. जखमी शुभम सरकार यांना तात्काळ उपचारासाठी ससून रुग्णालयात दाखल करण्यात आले. मात्र, तोपर्यंत उशिर झालेला होता. रुग्णालयात पोहोचताच डॉक्टरांनी त्यांना मृत घोषित केले. या वेळी दोघांच्या भांडणात मध्यस्थी करणाऱ्या रामप्रीत मंडल यांच्या डोक्यातही आरोपी मार्डी याने हातोडा मारला होता. त्यात मंडल जखमी झाले आहे. याप्रकरणी पोलिसांनी कमल मार्डी याला ताब्यात घेतलं असून त्याच्यावर खुनाचा गुन्हा दाखल करण्यात आला आहे. पुढील तपास कोंढवा पोलिस करीत आहेत.

'लेबर कॅम्पमधील मारहाणीची घटना समजताच घटनास्थळी धाव घेऊन कमल मार्डी याला ताब्यात घेतले. दरम्यान, जखमीला डॉक्टरांनी मृत घोषित केल्यावर खुनाचा गुन्हा दाखल केला', अशी माहिती कोंढवा पोलिस ठाण्याचे वरिष्ठ निरीक्षक संतोष सोनवणे यांनी दिली.