Pune : अवघ्या पावणेचार वर्षांच्या मुलीला टेकडीवर नेऊन केला लैंगिक अत्याचार;बलात्कारी नराधमास २१ वर्षांचा कारावास....

Pune  : आपल्या देशात बलात्काराच्या संख्येत मोठ्या प्रमाणात वाढत होत असून लहान चिमुकल्यांवर लैंगिक अत्याचारचे प्रमाण वाढले आहे. अशीच एक जिव्हारी लागणारी घटना घडली आहे.तडीपार केले असतानाही शहरात येऊन अवघ्या पावणेचार वर्षांच्या मुलीला टेकडीवर नेऊन तिच्यावर लैंगिक अत्याचार करणाऱ्या नराधमाला २१ वर्षांची सक्तमजुरी आणि ७५ हजार रुपयांचा दंड, लैंगिक अत्याचारापासून बालकांचे संरक्षण कायद्याच्या (पोक्सो) न्यायालयाने ठोठावला. विशेष न्यायाधीश के. पी. क्षीरसागर यांनी हा निकाल दिला.

कोण होता तो नराधम?

उच्चाप्पा लिंगाप्पा मंगळूर (वय ३०, रा. चिंचवड) असे शिक्षा झालेल्या दोषीचे नाव आहे. त्याच्याविरोधात पीडित मुलीच्या वडिलांनी चिंचवड पोलिस ठाण्यात तक्रार दिली होती. ही घटना दोन ऑक्टोबर २०१८ रोजी बिजलीनगर येथील टेकडीवर घडली. आरोपी उच्चाप्पाला तत्कालीन पुणे शहर आयुक्तालय व पुणे ग्रामीण जिल्ह्याच्या हद्दीतून तडीपार करण्यात आले होते.

CM Eknath Shinde on Badlapur Case : बदलापूरच्या नराधमाला फाशीच, मुख्यमंत्र्यांनी निक्षून सांगितलं, शिवकालीन शिक्षेचा दाखला

मात्र, तो तडीपारीच्या आदेशाचे उल्लंघन करून शहरात आला. पीडित मुलगी घरासमोर अंगणवाडीच्या मैदानात खेळत असताना आरोपीने तिला टेकडीवर नेऊन लैंगिक अत्याचार केले. या प्रकरणी गुन्हा दाखल झाल्यावर पोलिसांनी आरोपीला अटक करून त्याच्याविरोधात आरोपपत्र दाखल केले.
आरोपीला शिक्षा द्या

या खटल्यात विशेष सरकारी वकील नितीन कोंघे यांनी काम पाहिले. त्यांनी सरकार पक्षातर्फे दहा साक्षीदार तपासले. त्यात पीडित मुलीसह प्रत्यक्षदर्शी साक्षीदार, वैद्यकीय अधिकारी यांनी दिलेली साक्ष महत्त्वाची ठरली. आरोपीने त्याची वासना शमविण्यासाठी हा घृणास्पद गुन्हा केला आहे. त्यामुळे पीडितेला शारीरिक व मानसिक धक्का बसला. आरोपीची गुन्हेगारी पार्श्वभूमी लक्षात घेऊन कोणतीही दयामाया न दाखविता त्याला कठोर शिक्षा द्यावी, असा युक्तिवाद विशेष सरकारी वकील नितीन कोंघे यांनी केला.
सरकार पक्ष व बचाव पक्षाचा युक्तिवाद ऐकल्यावर न्यायालयाने आरोपीला कठोर शिक्षा सुनावली; तसेच पीडितेला भरपाई देण्याचे आदेश पुणे जिल्हा विधी सेवा प्राधिकरणाला दिले. चिंचवड ठाण्याचे वरिष्ठ निरीक्षक जितेंद्र कोळी, हवालदार दिनेश बांबळे यांनी न्यायालयाच्या कामकाजात मदत केली.