विदर्भात राजकीय भूकंप; काँग्रेसच्या २३ नगरसेवकांना ५ लाखांचे आमिष दाखवून 'पळवून नेले', वडेट्टीवारांचा भाजपवर गंभीर आरोप!

नागपूर: आगामी विधान परिषद निवडणुकीच्या पार्श्वभूमीवर पूर्व विदर्भातील राजकीय वातावरण कमालीचे तापले आहे. काँग्रेसचे ज्येष्ठ नेते आणि विधिमंडळ गटनेते विजय वडेट्टीवार यांनी भाजपवर अत्यंत गंभीर आरोप करत खळबळ उडवून दिली आहे. पूर्व विदर्भातील काँग्रेसच्या २३ नगरसेवकांना प्रत्येकी ५ लाख रुपयांचा आगाऊ (ॲडव्हान्स) मोबदला देऊन भाजपने अज्ञातस्थळी पळवून नेल्याचा दावा वडेट्टीवार यांनी केला आहे.

वडेट्टीवार यांनी माध्यमांशी बोलताना सांगितले की, सत्तेच्या मस्तीत मग्रूर झालेल्या भाजपने लोकशाहीचा लिलाव मांडला आहे. चंद्रपूर आणि गडचिरोली जिल्ह्यातील काँग्रेसच्या नगरसेवकांना पैशांचे आमिष दाखवून आणि धमकावून त्यांना भाजपच्या गोटात नेले जात आहे. "काँग्रेस जेवढे पैसे देईल, त्यापेक्षा दुप्पट देण्याचे आमिष त्यांना दिले जात आहे. आमच्याकडे याचे सर्व पुरावे आणि रेकॉर्ड्स आहेत," असा इशाराही त्यांनी दिला. या नगरसेवकांवर आता पक्षाकडून व्हीप जारी करून त्यांना अपात्र करण्याची कायदेशीर प्रक्रिया तातडीने सुरू केली जाणार असल्याचे त्यांनी स्पष्ट केले.

विजय वडेट्टीवार यांनी भाजपवर टीका करताना म्हटले की, राज्यातील सत्तेचा गैरवापर करून हे सर्व घडवून आणले जात आहे. ठेकेदारच भाजपचे आमदार झाल्याने त्यांच्याकडे पैशाची मस्ती आली आहे आणि त्यातूनच हा 'घोडेबाजार' सुरू आहे. "जर राज्यात भाजपची सत्ता नसती, तर एकाही नगरसेवकाची पक्षांतर करण्याची हिंमत झाली नसती," असेही ते म्हणाले.

दुसरीकडे, भाजप आमदार बंटी भांगडिया यांनी हे सर्व आरोप फेटाळून लावले आहेत. "काँग्रेसचे नगरसेवक नॉट रिचेबल आहेत हे मलाही बातम्यांतूनच कळले, मी काँग्रेसचा नेता नाही, त्यामुळे त्यांच्या नगरसेवकांना सांभाळण्याची जबाबदारी माझी नाही," असे म्हणत त्यांनी या प्रकरणापासून अंतर राखले आहे. दरम्यान, विधान परिषद निवडणुकीच्या निमित्ताने पूर्व विदर्भातील राजकारण अधिक तीव्र झाले असून, आता यावर निवडणूक आयोग काय भूमिका घेते, याकडे सर्वांचे लक्ष लागले आहे.