Pimpri-Chinchwad : लॉज-स्पामध्ये अनैतिक धंदे; पोलिसांची धडक कारवाई, रॅकेटचा पर्दाफाश, अनेक महिलांची सुटका

Pimpri-Chinchwad : पिंपरी- चिंचवड शहरात वेश्या व्यवसाय चालवणाऱ्या स्पा सेंटर आणि लॉजवर अनैतिक मानवी वाहतूक प्रतिबंधक विभागाने मोठी कारवाई करत आठ महिलांची सुटका केली आहे. या कारवाईत विशालनगर येथील इंटरनल फॅमिली स्पा येथून चार महिलांची, तर निगडी येथील ईगल स्पा मधून दोन महिलांची सुटका करण्यात आली आहे. याशिवाय कृष्णा लॉज आणि आळंदी येथील योगीराज लॉज येथेही छापे टाकून प्रत्येकी एका महिलेची सुटका करण्यात आली आहे.

पिंपरी- चिंचवडचे पोलीस आयुक्त विनायक कुमार चौबे यांनी स्पा सेंटरच्या नावाखाली चालणाऱ्या बेकायदेशीर वेश्याव्यवसायाविरोधात कठोर भूमिका घेत कारवाईचे आदेश दिले आहेत. पोलीस उपायुक्त शिवाजी पवार आणि सहाय्यक पोलीस आयुक्त विशाल हिरे यांच्या मार्गदर्शनाखाली अनैतिक मानवी वाहतूक प्रतिबंधक विभागाचे पोलीस निरीक्षक नितीन गीते यांच्या नेतृत्वाखाली ही कारवाई करण्यात आली.

Nanded Crime : राजकीय दबाव आणि सरपंचाचा सल्ला; पोटच्या मुलीची हत्या, नांदेडच्या थरारक प्रकरणात विद्यमान सरपंच अटकेत

वाकड पोलीस ठाण्याच्या हद्दीतील इंटरनल फॅमिली स्पा येथे रात्री सुमारे दहाच्या सुमारास पोलिसांच्या पथकाने छापा टाकत चार महिलांची सुटका केली. या प्रकरणी स्पा चालवणाऱ्या महिलेविरोधात गुन्हा दाखल करण्यात आला असून स्पा मॅनेजर अब्दुल मोहम्मद हुसेन कलाम याला अटक करण्यात आली आहे. वाकड पोलीस ठाण्यात पीटा कायद्याअंतर्गत गुन्हा नोंदवण्यात आला आहे.

दुसरी कारवाई निगडी येथील ईगल स्पा येथे करण्यात आली असून तेथून दोन महिलांची सुटका करण्यात आली आहे. अधिक पैशांचे आमिष दाखवून महिलांकडून जबरदस्तीने वेश्याव्यवसाय करून घेतला जात असल्याची माहिती पोलिस तपासात समोर आली आहे.

तसेच कृष्णा लॉज आणि आळंदी येथील योगीराज लॉज येथेही छापे टाकून दोन महिलांची सुटका करण्यात आली आहे.

दरम्यान, गेल्या एक महिन्यात पिंपरी-चिंचवड पोलीस आयुक्तांनी वेश्याव्यवसायासाठी प्रवृत्त करणाऱ्या तीन आस्थापनांवर एक वर्षासाठी बंदी घातली आहे. यामध्ये चिंचवडमधील निक्की लॉज, काळेवाडी येथील लेमन ग्रास थाई स्पा आणि सांगवी येथील औरा थाई स्पा यांचा समावेश आहे.

२०२५ मध्ये आतापर्यंत पिंपरी-चिंचवड पोलिसांनी २५ स्पा सेंटरवर छापे टाकत पीटा कायद्याअंतर्गत गुन्हे दाखल केले आहेत. या कारवाईत ४५ आरोपींना अटक करण्यात आली असून ६३ पीडित महिलांची सुटका करण्यात आल्याची माहिती पोलीस निरीक्षक नितीन गीते यांनी दिली आहे.