नागपुर: जेलमधून जामिनावर बाहेर आलेल्या तरुणाची सिम्बायोसिस कॉलेजमागील जंगलात डोक्यात दगड घालून निर्घृण हत्या.

नागपूर: एका हत्या प्रकरणात कारागृहात असलेल्या आणि सुमारे दोन महिन्यांपूर्वी जामिनावर बाहेर आलेल्या 20 वर्षीय तरुणाची दगडाने डोके ठेचून निघृण हत्या करण्यात आल्याची धक्कादायक घटना नागपुरातील वाठोडा पोलीस ठाण्याच्या हद्दीत उघडकीस आली आहे. सिंबॉयसिस कॉलेजच्या मागील जंगल परिसरातील झुडुपांमध्ये काल शुक्रवारी सकाळी रक्ताच्या थारोळ्यात या तरुणाचा मृतदेह आढळून आला. या प्रकरणी वाठोडा पोलिसांनी तीन संशयितांना ताब्यात घेतलं असून त्यांची कसून चौकशी सुरू आहे. मृतकाची ओळख प्रतीक राजू करांडेकर (वय 20) अशी झाली आहे.

नेमकं काय घडलं?
मिळालेल्या माहितीनुसार, प्रतीक याच्याविरुद्ध 2025 मध्ये एचबी टाऊन परिसरात झालेल्या एकाहत्या प्रकरणात गुन्हा दाखलकरण्यात आला होता. या प्रकरणात प्रतीकला त्याच्या तीन साथीदारांसह अटक करण्यात आली होती. सुमारे दोन महिन्यांपूर्वी प्रतीक आपल्या अन्य दोन साथीदारांसह जामिनावर कारागृहातून बाहेर आला होता. गुरुवारी 6 ऑगस्ट रोजी सायंकाळी प्रतीक मोटारसायकल घेऊन घराबाहेर पडला होता. काही कामानिमित्त बाहेर जात असल्याचं त्याने कुटुंबीयांना सांगितलं होतं. मात्र, त्यानंतर तो घरी परतला नाही. काल शुक्रवारी सकाळी सिंबॉयसिस कॉलेजच्या मागील जंगल परिसरात एका तरुणाचा रक्तबंबाळ अवस्थेतील मृतदेह आढळून आल्यानं परिसरात खळबळ उडाली. घटनेची माहिती मिळताच वाठोडा पोलिसांनी घटनास्थळी धाव घेत पंचनामा करून मृतदेह शवविच्छेदनासाठी रुग्णालयात पाठविला.

हत्येचं गूढ उकलणार?
प्राथमिक तपासात प्रतीक रात्री काही जणांसोबत याच परिसरात असल्याची माहिती पोलिसांना मिळाली आहे. या सर्वांनी एकत्रितपणे मद्यपान केल्याचंही तपासात समोर आलं आहे. मद्यपान करताना कोणत्या तरी कारणावरून त्यांच्यात वाद झाला असावा आणि त्यानंतर प्रतीकच्या डोक्यावर दगडाने वार करून त्याची हत्या करण्यात आली असावी, असा पोलिसांचा प्राथमिक अंदाज आहे.

दरम्यान, पोलिसांनी या प्रकरणात तीन संशयितांना ताब्यात घेतलं असून त्यांची चौकशी सुरू आहे. हत्या नेमकी कोणत्या कारणातून झाली, आरोपी आणि मृतक यांच्यात पूर्वीपासून काही वाद किंवा वैमनस्य होतं का, तसेच या हत्येमागे आणखी कोणाचा सहभाग आहे का? या सर्व शक्यता तपासल्या जात आहेत. या प्रकरणाचा तपास वाठोडा पोलीस करत असून घटनास्थळावरील पुरावे, सीसीटीव्ही फुटेज, मोबाईल कॉल रेकॉर्ड तसेच संशयितांच्या चौकशीतून हत्येचं गूढ उकलण्याचा प्रयत्न सुरू आहे.