Rain Alert : विदर्भात पुढील आठवडाभर पावसाचा इशारा; पूर्व विदर्भात मुसळधार पावसाची शक्यता

Nagpur : गेले काही दिवस पावसाने दडी मारली असताना आता पावसाला सुरवात झाली आहे. यात बंगालच्या खाडीमध्ये कमी दाबाचा पट्टा तयार झाला असल्याने विदर्भातील काही जिल्ह्यात ऑरेंज, तर काही जिल्ह्यात एलो अलर्ट देण्यात आला आहे. यामुळे संपूर्ण विदर्भात पुढील ५ ते ७ दिवस पावसाचा अंदाज वर्तविण्यात आला आहे. तेच पूर्व विदर्भात मुसळधार पावसाची शक्यता आहे.

राज्यातील अनेक भागात आता पावसाने हजेरी लावली आहे. यामुळे आकाशाकडे नजरा लावून बसलेल्या बळीराजाला दिलासा मिळाला आहे. तर अजूनही काही भागात पावसाची प्रतीक्षा असून विदर्भ व मराठवाड्यातील काही भागात जोरदार पाऊस सुरु आहे. विदर्भात पुढील काही दिवस पावसाची शक्यता वर्तविण्यात आली असून चंद्रपूर, गडचिरोली, वर्धा, वाशिम, यवतमाळ, अमरावती जिल्ह्यात ऑरेंज अलर्ट जारी केला आहे.

१७ ऑगस्टपासून जोरदार पाऊस दरम्यान उद्याही विदर्भात पावसाची शक्यता वर्तविली असून १५ ते १६ ऑगस्टला पावसाचा जोर कमी राहील. त्यानंतर म्हणजे १७ ऑगस्टपासून पुन्हा पावसाचा जोर वाढणार आहे. खासकरून पूर्व विदर्भात अधिक पावसाचा जोर पाहायला मिळेल असा अंदाज व्यक्त केला जात आहेय. तसेच १७ ते १९ ऑगस्टला पाऊस अधिक पडण्याची शक्यता असून सातत्याने पाऊस असल्याने तापमानात ५ ते ७ अंशने कमी होणार आहे.

अकोला जिल्ह्यात तीन दिवस पावसाचा इशारा

अकोला शहरासह ग्रामीण भागात आजपासून १५ ऑगस्टपर्यंत पावसाची शक्यता वर्तविण्यात आली आहे. नागपूरच्या प्रादेशिक हवामान केंद्राने अंदाज वर्तविला असून आज सकाळपासूनच अकोला शहरासह ग्रामीण भागात रिपरिप पावसाची हजेरी लावली. पावसामुळे नदी, नाले व तळ्यांतील पाणीसाठ्यात वाढ झाली. अनावश्यकपणे पाण्यात जाण्याचे धाडस करू नये. नदीमध्ये वाहून जाणे किंवा बुडण्याची शक्यता आहे. पुर आलेल्या रस्त्यावरून गाडी चालविणे टाळावे. तसेच नदीकाठाजवळील गावातील ग्रामस्थांना सतर्कतेच्या सुचना अकोला जिल्हा प्रशासनाने दिल्या.