उत्तर प्रदेश: युट्यूबवर शोधली हत्येची आयडिया! विवाहित प्रियकराने औषधाच्या नावाखाली नर्स प्रेयसीला दिली विषारी ड्रिप

उत्तर प्रदेश: मेरठ शहर एकापाठोपाठ एक घडणाऱ्या अतिशय धक्कादायक आणि काळजाचा ठोका चुकवणाऱ्या गुन्ह्यांनी हादरून गेले आहे. 'निळा ड्रम हत्याकांड' आणि 'साप कांड' या भीषण घटना ताज्या असतानाच, आता एका खाजगी रुग्णालयाच्या ऑपरेशन थिएटरमध्ये २५ वर्षांच्या नर्सची अत्यंत क्रूरपणे हत्या करण्यात आल्याची धक्कादायक घटना समोर आली आहे. या प्रकरणात विवाहित प्रियकराने हत्येची आयडिया युट्यूबवरून शोधल्याचे उघडकीस आले आहे.

मिळालेल्या सविस्तर माहितीनुसार, मेरठच्या लोहियानगर भागातील एका खाजगी रुग्णालयात काम करणाऱ्या नेहा राणी (वय २५) या तरुण नर्सची हत्या तिच्याच ओटी (OT) टेक्निशियन प्रियकर सुरेश याने आपल्या फरहान नावाच्या मित्राच्या मदतीने केली. आरोपी सुरेश हा आधीपासूनच विवाहित होता, तरीही त्याचे मृत नेहाशी प्रेमसंबंध जुळले होते. मात्र, नेहा त्याच्यावर लग्नासाठी सातत्याने दबाव टाकत असल्यामुळे सुरेशने तिला संपवण्याचा भयानक कट रचला.

यासाठी आरोपी सुरेशने युट्यूबवर जाऊन कोणाच्याही लक्षात न येता किंवा पुरावा मागे न सोडता विष देऊन हत्या कशी करावी, याचे व्हिडिओ पाहिल्याचे तपासात निष्पन्न झाले. युट्यूबवरून आयडिया मिळाल्यानंतर त्याने रुग्णालयाच्या ऑपरेशन थिएटरमध्येच नेहा राणी हिला औषधाच्या किंवा उपचाराच्या नावाखाली थेट विषारी ड्रिप (सलाईन) चढवली. या विषारी ड्रिपच्या प्रभावामुळे नेहाचा जागीच मृत्यू झाला. या थरारक घटनेमुळे संपूर्ण वैद्यकीय वर्तुळात आणि शहरात प्रचंड खळबळ उडाली असून, पोलिसांनी मुख्य आरोपी सुरेश आणि त्याच्या साथीदाराला बेड्या ठोकल्या आहेत.