Mumbai : मुंबई–विजयदुर्ग रो-रो फेरीला हिरवा झेंडा; पहिल्याच दिवशी 300 पेक्षा अधिक प्रवासी – जाणून घ्या फायदा कसा होणार

Mumbai : मुंबई-विजयदुर्ग रो-रो जलवाहतूक सेवेचे रविवारी लोकार्पण करण्यात आले. कोकणातील शिमग्याच्या पार्श्वभूमीवर ही सेवा सुरू झाली आहे. मत्स्यव्यवसाय व बंदरे मंत्री नितेश राणे यांच्या हस्ते झेंडा दाखवून भाऊचा धक्का येथून या सेवेची पहिली फेरी कोकणच्या दिशेने रवाना झाली. पहिल्याच फेरीला मुंबईकर चाकरमानी व पर्यटकांचा उत्स्फूर्त प्रतिसाद लाभला.

वेळ, खर्च आणि श्रम वाचतील
रो-पॅक्स सेवा मुख्यमंत्री देवेंद्र फडणवीस यांच्या पायाभूत सुविधा आणि सागरी विकासाला चालना देणाऱ्या महत्त्वाकांक्षी प्रकल्पांपैकी एक मानली जाते. राज्यातील सागरी वाहतूक अधिक सक्षम आणि गतिमान करण्याच्या दृष्टीने हा महत्त्वपूर्ण टप्पा आहे. ‘कोकण आणि मुंबई यांना अधिक प्रभावीपणे जोडण्यासाठी जलवाहतूक हा सर्वोत्तम पर्याय आहे. या सेवेच्या माध्यमातून प्रवाशांचा वेळ, खर्च आणि श्रम वाचतील, असा विश्वास मंत्री नितेश राणे यांनी व्यक्त केला आहे.

कोकणातील भजनी बुवा प्रमोद धुरी यांनी बोटीच्या शुभारंभ प्रसंगी मंत्री नितेश राणे यांच्यासमवेत गाऱ्हाणे घालून प्रवासाचा श्रीगणेशा केला. मंत्री राणे यांनी सेवेला हिरवा झेंडा दाखवला. ‘रो-पॅक्स सेवेमुळे केवळ प्रवास सुलभ होणार नाही, तर कोकणातील पर्यटन, मत्स्यव्यवसाय, स्थानिक व्यापार आणि उद्योगधंद्यांना मोठी चालना मिळणार आहे. पर्यटन क्षेत्रात वाढ होऊन स्थानिक रोजगाराच्या संधी निर्माण होतील. तसेच माल वाहतुकीसाठीही हा मार्ग अधिक उपयुक्त ठरणार आहे. कोकणातील नागरिकांसाठी आणि विशेषतः मुंबईत वास्तव्यास असलेल्या चाकरमान्यांसाठी ही सेवा अत्यंत दिलासादायक ठरणार आहे’, असा विश्वास त्यांनी व्यक्त केला आहे.

पहिली बोट बंदरात दाखल
शिमगोत्सवासाठी कोकणवासीयांनी रो-रो प्रवासी बोटीने प्रवासास पसंती दिली. रविवारी दुपारि ४.२० मिनिटांनी पहिली रो-रो बोट सेवा विजयदुर्ग बंदरात दाखल झाली. यावेळी नागरिकांकडून जोरदार स्वागत करण्यात आले. मुंबई ते कोकण रो रो सेवा सुरू झाल्यामुळे कोकणातील पर्यटनाला नवा आयाम मिळणार आहे. रविवारी ३९० प्रवाशांनी या बोटीने प्रवास केला. तर या फेरीबोटीत पहिल्या दिवशी २१ चारचाकी गाड्या तर १३ मोटरसायकल होत्या.

मुंबई ते विजयदुर्ग हा प्रवास अवघ्या सहा ते सात तासांत पूर्ण होणार असल्याने वेळेची मोठी बचत होणार आहे. परंतु, तिकीटदर काहीसा जास्त असल्याने या सेवेला पुढील काळात नागरिकांचा कसा प्रतिसाद मिळतो, हे पाहावे लागणार आहे.