Mumbai : शिवसेना शिंदे गटाच्या नेत्या शीतल म्हात्रेच्या मॉर्फ व्हिडिओ प्रकरणात दहिसर पोलिसाकडून गुन्ह्याची नोंद;दोन आरोपी अटकेत

मुंबई - शिवसेना शिंदे गटाचे आमदार प्रकाश सुर्वे आणि प्रवक्त्या शीतल म्हात्रे यांची समाज माध्यमांवर मॉर्फ केलेली चित्रफीत प्रसारीत केल्याप्रकरणी दहिसर पोलिसांनी दोन आरोपींना अटक केली. अशोक मिश्रा व मानस कुवर अशी अटक आरोपींची नावे आहेत.

शीतल म्हात्रे यांच्या तक्रारीवरून दहिसर पोलिसांनी याप्रकरणी विनयभंग व माहिती तंत्रज्ञान प्रतिबंधक कायदयांतर्गत गुन्हा दाखल केला होता.

मोर्फ व्हिडिओ वायरल

श्रीकृष्णनगर परिसरात शनिवारी रात्री विकासकामांच्या उद्घाटनाचा कार्यक्रम आयोजित करण्यात आलेला होता. त्यावेळी श्रीकृष्णनगर येथून अशोकवन जंक्शन, दहिसर पूर्वपर्यंत रॅलीचे आयोजन करण्यात आले होते.

अशोकवन येथे मुख्यमंत्री एकनाथ शिंदे यांच्या सभेचे आयोजन करण्यात आले होते. या कार्यक्रमाचे आयोजन मागाठाणे मतदारसंघाचे आमदार प्रकाश सुर्वे यांच्याकडून करण्यात आले. त्या कार्यक्रमातील रॅलीतील चित्रफीत मॉर्फ करुन व्हायरल करण्यात आल्याने शीतल म्हात्रे यांनी पोलीस ठाण्यात तक्रार दिली होती.

ट्विट करून माहिती

चित्रफीतीबाबत शीतल म्हात्रे यांनी ट्वीट करत या प्रकरणी माहिती उघड केली. शीतल म्हात्रे यांनी केलेल्या ट्विटप्रमाणे “राजकारणामधील महिलेसंदर्भात बोलण्यासारखे काही नसले तर तिचे चारित्र्यहनन करणे हेच उद्ध्वस्त गटाचे संस्कार आहेत?

मातोश्री नावाच्या फेसबूक पेजवरुन एका स्त्री संदर्भात असा मॉर्फ व्हिडीओ अपलोड करताना बाळासाहेबांचे संस्कार नाही का आठवले?” हे व्हिडीओ व्हायरल करणारे कोण आहेत हे सर्वांना माहिती आहे. विरोधक एवढ्या खालच्या पातळीवर जाऊ शकतात.

शिवाजी महाराजांच्या महाराष्ट्रात एखाद्या स्त्रिला अशा पद्धतीने बदनाम करू शकतात. भावा-बहिणीचे नाते असलेल्या एखाद्या स्त्री-पुरुषाला समाज विकृत नजरेने बघतो आहे. यामागे कुणाचे डोके आहे आणि कोण करते आहे याची आम्हाला पूर्ण कल्पना आहे,” असे मत शीतल म्हात्रे यांनी व्यक्त केले.