नेपाळमध्ये मोठा विमान अपघात टळला! लँडिंगवेळी विमानाच्या टायरला भीषण आग; २८९ प्रवाशांचा जीव थोडक्यात वाचला

नेपाळची राजधानी काठमांडू येथील त्रिभुवन आंतरराष्ट्रीय विमानतळावर (TIA) सोमवारी सकाळी एक मोठी दुर्घटना होता होता राहिली. इस्तंबूलहून काठमांडूला येणाऱ्या टर्किश एअरलाईन्सच्या विमानाने (TK726) लँडिंग करताना अचानक पेट घेतला.
विमानाच्या उजव्या बाजूच्या टायरला आग लागल्याने परिसरात एकच खळबळ उडाली. मिळालेल्या माहितीनुसार, या विमानात २७८ प्रवासी आणि ११ कर्मचारी असे एकूण २८९ लोक सवार होते.

यामध्ये संयुक्त राष्ट्रांच्या (UN) काही अधिकाऱ्यांचाही समावेश होता.
धावपट्टीवर उतरत असताना टायरमधून धूर आणि आगीच्या ज्वाळा निघू लागल्याने तातडीने बचाव कार्य सुरू करण्यात आले. विमानतळावरील अग्निशमन दल आणि सुरक्षा पथकाने काही मिनिटांतच आगीवर नियंत्रण मिळवले.

सर्व प्रवाशांना आपत्कालीन दरवाजातून सुरक्षितपणे बाहेर काढण्यात आले असून सुदैवाने कोणालाही इजा झालेली नाही. या घटनेमुळे विमानतळाची सेवा काही काळासाठी विस्कळीत झाली होती. तांत्रिक बिघाड किंवा ब्रेकिंग सिस्टममधील दोषामुळे ही आग लागल्याचा प्राथमिक अंदाज व्यक्त केला जात आहे.