Mahadevi Elephant Case : 'महादेवी'ला परत आणण्यासाठी सरकार काय करणार? CM फडणवीसांनी सांगितला मार्ग, नेमकं काय म्हणाले?

 

Mahadevi Elephant Case : कोल्हापुरमधील नांदणी गावातील महादेवी हत्तीणीला परत आणण्यासाठी जोरदार मागणी केली जात आहेत. आज मंत्रालयात मुख्यमंत्री देवेंद्र फडणवीस यांच्या उपस्थितीमध्ये महादेवी हत्तीणीसाठी महत्वाची बैठक पार पडली. या बैठकीकडे सर्वांचे लक्ष लागले होते. अखेर या बैठकीमध्ये महत्वाचा निर्णय घेण्यात आला आहे. या हत्तीणीला परत आणण्यासाठी सरकारने सकारात्मक प्रतिसाद दिला आहे. 'महादेवी हत्तीणीला परत आणण्यासाठी नांदणी मठाने याचिका दाखल करावी. सरकार देखील याबाबत याचिका दाखल करणार आहे.' , असे मुख्यमंत्री देवेंद्र फडणवीस यांनी सांगितले.

मंत्रालयामध्ये सुरू असलेल्या या बैठकीकडे नांदणी गावासह संपूर्ण कोल्हापूर जिल्ह्याचे लक्ष लागले होते. अखेर या बैठकीतून महत्वाचा निर्णय आला. सरकार नांदणी गावासोबत असल्याचे कळताच गावकऱ्यांनी आनंद व्यक्त केला. मुख्यमंत्र्यांच्या या निर्णयाचे नांदणी ग्रामस्थांनी स्वागत केले खरे पण काही ग्रामस्थांनी सरकारने निर्णय घ्यायला उशिर केला असल्याचे मत मांडले. या बैठकीला राजू शेट्टी देखील उपस्थित राहिले.

दरम्यान, कोल्हापूर जिल्ह्यातील नांदणी मठातील महादेवी हत्तीणीसंदर्भात राज्य सरकार सकारात्मक आहे. सरकार देखील यासंदर्भात सुप्रीम कोर्टात याचिका दाखल करणार असल्याचे मुख्यमंत्र्यांनी सांगितले. या निर्णयानंतर नांदणी गावातील ग्रामस्थांमध्ये समाधानाचे वातावरण आहे. गावकऱ्यांनी या निर्णयाबाबत मुख्यमंत्र्यांचे आभार मानले. तर, महादेवी हत्तीणीला परत आणण्यासाठी आज गडहिंग्लज तहसीलदार कार्यालयावर मोर्चा काढण्यात आला. मोर्चामध्ये हजारो नागरिक सहभागी झालेत. गडहिंग्लज इथल्या दसरा चौक परिसरातून तहसीलदार कार्यालयापर्यंत हा मोर्चा काढण्यात आला.