गुजरात: आंघोळीचा व्हिडिओ अन् ब्लॅकमेलिंगचा बदला, गांधीनगरमध्ये पती-पत्नीने केला विद्यार्थ्याचा गेम.

गुजरात: गांधीनगर जिल्ह्यात एका २० वर्षीय महाविद्यालयीन विद्यार्थ्याची (हार्दिक) एका विवाहित जोडप्याने हत्या केल्याचा धक्कादायक प्रकार समोर आला आहे.

नेमकी घटना काय?
मृतक हार्दिक आणि संबंधित विवाहित महिला शेजारी राहत होते. सुमारे दीड-दोन महिन्यांपूर्वी हार्दिकने त्या महिलेचा आंघोळ करतानाचा व्हिडिओ शूट केल्याचा आरोप आहे. या व्हिडिओच्या आधारे हार्दिक त्या महिलेला वारंवार ब्लॅकमेल करत होता आणि तिला शारीरिक संबंध ठेवण्यास भाग पाडत होता. बदनामीच्या भीतीने महिला त्याच्या मागण्या मान्य करत होती.

 

हत्येचा कट:
महिलेच्या पतीने जेव्हा तिला हार्दिकसोबत फोनवर बोलताना पकडले, तेव्हा सत्य समोर आले. हार्दिकची उर्मट वागणूक आणि ब्लॅकमेलिंगचा त्रास सहन न झाल्याने पतीने त्याला संपवण्याचा कट रचला. यात पत्नीनेही त्याला साथ दिली. ११ जुलै रोजी, पती कामावर गेल्याचे नाटक करून बाहेर पडला आणि पत्नीने हार्दिकला घरी बोलावले. हार्दिक घरात शिरताच पती मागच्या दाराने आत आला. पत्नीने हार्दिकचे हात धरले आणि पतीने स्कार्फ व केबलच्या सहाय्याने गळा आवळून त्याची हत्या केली.

हत्येनंतरचे कृत्य:
हत्येनंतर जोडप्याने हार्दिकचा मृतदेह पोत्यात भरला, घराला कुलूप लावले आणि आपल्या मुलांना घेऊन तिथून पळ काढला. मात्र, पोलिसांनी तपास करून या जोडप्याला अटक केली आहे. धक्कादायक बाब म्हणजे, ज्या व्हिडिओच्या आधारे हार्दिक ब्लॅकमेल करत होता, तो व्हिडिओ त्या महिलेने किंवा तिच्या पतीने कधीही पाहिलेला नव्हता. कलोल पोलिसांनी हत्येचा गुन्हा दाखल केला असून पुढील तपास सुरू आहे.