पुणे: पिंपरी-चिंचवडमधील वाल्हेकरवाडीत चार्जिंगला लावलेल्या ई-बाईकच्या बॅटरीचा स्फोट; तीन दुचाकी जळून खाक, इमारतीत अडकलेल्या दोन महिलांची सुटका

पुणे: पिंपरी-चिंचवडमधील वाल्हेकरवाडी परिसरातील दगडोबा चौक भागात एका निवासी इमारतीच्या पार्किंगमध्ये चार्जिंगला लावलेल्या इलेक्ट्रिक दुचाकींना अचानक भीषण आग लागल्याची घटना घडली. या दुर्घटनेत तीन इलेक्ट्रिक दुचाकी पूर्णपणे जळून खाक झाल्या असून, आगीने रौद्र रूप धारण केल्यामुळे शेजारच्या दोन मजली इमारतीला मोठा वेढा दिला होता. सुदैवाने या घटनेत कोणतीही जीवितहानी झाली नसून, पिंपरी-चिंचवड महानगरपालिकेच्या अग्निशामक दलाच्या जवानांनी इमारतीच्या वरच्या मजल्यावर अडकलेल्या दोन महिलांची सुटका करत मोठी दुर्घटना टळली.

नेमकी घटना काय?
मिळालेल्या माहितीनुसार, सोमवारी सकाळी वाल्हेकरवाडी येथील एका दोन मजली निवासी इमारतीच्या खालील भागात (पार्किंगमध्ये) इलेक्ट्रिक दुचाकी चार्जिंगसाठी ठेवण्यात आल्या होत्या. यादरम्यान अचानक एका ई-बाईकच्या बॅटरीमध्ये बिघाड होऊन किंवा शॉर्ट सर्किटमुळे भीषण आग लागली. पाहता पाहता या आगीने इतर दुचाकींनाही आपल्या चपेट्यात घेतले. पार्किंगमधील तीन इलेक्ट्रिक दुचाकी पूर्णपणे जळून खाक झाल्यानंतर आगीच्या प्रचंड ज्वाला आणि धूर थेट वरच्या मजल्यापर्यंत पोहोचले.

या अचानक लागलेल्या आगीमुळे इमारतीच्या पहिल्या व दुसऱ्या मजल्यावर राहणाऱ्या दोन महिला आतमध्येच अडकून पडल्या. आजूबाजूच्या नागरिकांनी तात्काळ या घटनेची माहिती पिंपरी-चिंचवड महानगरपालिकेच्या अग्निशमन दलाला दिली. माहिती मिळताच अग्निशमन दलाची वाहने आणि जवान तात्काळ घटनास्थळी दाखल झाले.

अग्निशामक जवानांचे धाडस आणि बचावकार्य
उप अग्निशमन अधिकारी गौतम इंगवले यांच्या मार्गदर्शनाखाली जवानांनी तातडीने सूत्रे हलवत आग नियंत्रणात आणण्याचे काम सुरू केले. शर्थीचे प्रयत्न करत जवानांनी इमारतीत अडकलेल्या दोन्ही महिलांना अत्यंत सुरक्षित बाहेर काढले. जवानांच्या तत्परतेमुळे आणि धैर्यामुळे संभाव्य मोठी जीवितहानी टळली.

दरम्यान, निवासी इमारतींमध्ये किंवा पार्किंगमध्ये इलेक्ट्रिक वाहनांची चार्जिंग करताना नागरिकांनी योग्य त्या सुरक्षा उपायांचे पालन करावे, असे आवाहन अग्निशमन विभातर्फे करण्यात आले आहे.