'नगरसेवक हरवले आहेत!' चंद्रपुरात संतप्त नागरिकांची बॅनरबाजी; काँग्रेसच्या अंतर्गत गटबाजीचा फटका थेट जनतेला

चंद्रपूर: महानगरपालिकेतील काँग्रेसच्या अंतर्गत सत्तासंघर्षाचा फटका आता थेट सामान्यांना बसू लागला आहे. गटनेतेपदाच्या वादातून काँग्रेसमध्ये दोन गट एकमेकांसमोर उभे ठाकले आहेत. यादरम्यान, आपले संख्याबळ टिकवून ठेवण्यासाठी नगरसेवकांना बाहेरगावी पाठवल्याने प्रभाग क्रमांक १७ मधील नागरिक आक्रमक झाले आहेत.

 

 

नगरसेवक हरवल्याची पोस्टरबाजी: काँग्रेसचे नगरसेवक आकाश मानकर आणि नगरसेविका महानंदा वाळके हे गेल्या १५ दिवसांपासून प्रभागात फिरकलेले नाहीत. यामुळे संतापलेल्या नागरिकांनी बल्लारपूर बायपास उड्डाणपुलाजवळ 'नगरसेवक हरवले आहेत!' असे मजकूर असलेले मोठे बॅनर लावले. या बॅनरवर "नगरसेवक पैसे कमवण्यात मग्न आहेत, तर जनतेच्या समस्या कोण सोडवणार? रस्ते, पाणी, आरोग्य व मूलभूत सुविधांची जबाबदारी कोणाची?" असे थेट सवाल उपस्थित करण्यात आले आहेत. हे बॅनर सध्या शहरभर चर्चेचा विषय ठरले असून त्याचे फोटो सोशल मीडियावरही व्हायरल झाले आहेत.

राजकीय सहली आणि जनतेची दुर्दैवा: पावसाळ्याच्या तोंडावर नालेसफाई, रस्त्यांवरील खड्डे, बंद पथदिवे आणि पाणी साचण्याच्या समस्यांनी नागरिक त्रस्त आहेत. अशा वेळी लोकप्रतिनिधींनी प्रभागात उपस्थित राहून कामे मार्गी लावणे अपेक्षित असताना, ते राजकीय सहलीत आणि गटातटाच्या राजकारणात व्यस्त आहेत. मुंबई उच्च न्यायालयाच्या नागपूर खंडपीठाने विभागीय आयुक्तांच्या निर्णयाला स्थगिती दिल्यानंतर, धानोरकर गटाला धक्का बसला असून, आपले नगरसेवक फुटू नयेत म्हणून त्यांना पुन्हा अज्ञातस्थळी 'सहलीवर' पाठवण्यात आल्याची माहिती सूत्रांनी दिली आहे.

जेव्हा हे नगरसेवक पुन्हा शहरात परततील, तेव्हा त्यांना वडेट्टीवार गटाकडे आकर्षित होण्यापासून वाचवण्यासाठी ही धडपड सुरू आहे. एकंदरीत, नेत्यांच्या राजकीय साठमारीत सामान्य नागरिक मात्र चिखल आणि समस्यांच्या गर्तेत अडकला आहे.

 

सविस्तर वाचा, लिंक कमेंट मध्ये https://punenews24.in/