गोकुळ' निकालानंतर मंत्री चंद्रकांत पाटलांचा मोठा दावा; पदवीधर आणि शिक्षक मतदारसंघाच्या निवडणुकीत महायुतीचा एकतर्फी विजय होणार!

कोल्हापूर: जिल्हा सहकारी दूध उत्पादक संघ अर्थात 'गोकुळ'च्या अतिशय अटीतटीच्या आणि राजकीयदृष्ट्या अत्यंत संवेदनशील ठरलेल्या निवडणुकीचे निकाल नुकतेच जाहीर झाले आहेत. या निवडणुकीत महायुतीच्या सर्व प्रमुख नेत्यांनी आपली प्रतिष्ठा पणाला लावली होती. या पार्श्वभूमीवर राजकीय वर्तुळात अनेक चर्चा रंगल्या असतानाच, उच्च व उच्चतंत्र शिक्षणमंत्री चंद्रकांत पाटील यांनी एक महत्त्वपूर्ण राजकीय विधान केले आहे. गोकुळच्या निकालांचे पडसाद उमटत असतानाच आता सर्वांचे लक्ष आगामी पुणे विभाग पदवीधर आणि शिक्षक मतदारसंघाच्या निवडणुकी लागल्याचे त्यांनी स्पष्ट केले.

पदवीधर व शिक्षक मतदारसंघात महायुतीचा एकतर्फी विजय होईल - चंद्रकांत पाटील:

मीडियाशी संवाद साधताना मंत्री चंद्रकांत पाटील यांनी आगामी विधान परिषदेच्या पदवीधर आणि शिक्षक मतदारसंघाच्या निवडणुकांबाबत मोठा दावा केला आहे. ते म्हणाले की, जरी गोकुळ निवडणुकीत अपेक्षेप्रमाणे निकाल लागला नसला किंवा काही ठिकाणी राजकीय समीकरणे बदलली असली, तरी याचा कोणताही नकारात्मक परिणाम आगामी पदवीधर आणि शिक्षक मतदारसंघावर होणार नाही. उलट या दोन्ही मतदारसंघांच्या निवडणुकांमध्ये महायुतीचे उमेदवार अत्यंत दणदणीत आणि एकतर्फी विजय संपादन करतील, असा ठाम विश्वास त्यांनी व्यक्त केला.

५० टक्क्यांपेक्षा जास्त मते मिळवण्याचा दावा:

पुढील राजकीय रणनीतीवर भाष्य करताना चंद्रकांत पाटील यांनी सांगितले की, महायुतीचे सर्व घटक पक्ष एकत्र येऊन या निवडणुकीची जय्यत तयारी करत आहेत. दोन्ही मतदारसंघांमधील मतदार वर्ग हा सुशिक्षित आणि सजग असून, राज्य शासनाने शिक्षण आणि विकास क्षेत्रात घेतलेल्या लोककल्याणकारी निर्णयांवर मतदार मोहर उमटवतील. महायुतीच्या उमेदवारांना निवडणुकीत ५० टक्क्यांपेक्षा अधिक मताधिक्य मिळेल आणि विरोधकांना पराभवाचा सामना करावा लागेल, असा दावा करत त्यांनी विरोधकांच्या दाव्या हवा काढून घेतली आहे. या वक्तव्यामुळे कोल्हापूरसह पुणे विभागाच्या राजकारणात पुन्हा एकदा राजकीय चलबिचल वाढली आहे.