देश: रेल्वे प्रवाशांसाठी IRCTC ची नवीन बीटा वेबसाइट लाँच, आता 'तत्काळ' तिकीट बुक करणे होणार अधिक सोपे.

देश: आयआरसीटीसीच्या जुन्या वेबसाइटवर तिकीट बुक करताना प्रवाशांना अनेक अडचणींचा सामना करावा लागत होता. वारंवार लॉगिन करणे, क्लिष्ट कॅप्चा कोड भरणे आणि वेबसाइटची धिमी गती यामुळे प्रवाशांची गैरसोय होत होती. हे लक्षात घेता रेल्वेने नवीन बीटा वेबसाइट सादर केली आहे.

कॅप्चा आणि पॉप-अप्सची सुट्टी: नवीन वेबसाइटवर अनावश्यक कॅप्चा कोड, फ्लॅशिंग ग्राफिक्स आणि त्रासदायक पॉप-अप्स कमी करण्यात आले आहेत, ज्यामुळे तिकीट बुकिंगची प्रक्रिया अधिक वेगवान झाली आहे.

एकत्रित सीट उपलब्धता: आता प्रवाशाला प्रत्येक क्लास (उदा. स्लीपर, एसी ३ टियर, एसी २ टियर) वेगळे तपासण्याची गरज नाही. सर्व क्लासमधील सीट उपलब्धता एकाच स्क्रीनवर एकाच वेळी पाहता येणार आहे.

 

जलद चेकआउट: तिकीट बुक करण्यासाठी आवश्यक असलेल्या पायऱ्या (Steps) कमी केल्या आहेत, ज्यामुळे बुकिंगची प्रक्रिया अधिक सुटसुटीत झाली आहे.

सेव्ह केलेले पॅसेंजर डिटेल्स: वारंवार प्रवास करणाऱ्या प्रवाशांसाठी ही एक मोठी सुविधा आहे, जिथे प्रवाशांची माहिती (नाव, वय, लिंग) आधीच सेव्ह करून ठेवता येणार आहे, ज्यामुळे पुन्हा माहिती भरण्याचा वेळ वाचेल.

सुधारित क्षमता: नवीन प्लॅटफॉर्म एका मिनिटात १.५ लाख तिकीट बुकिंग हाताळू शकतो, ज्यामुळे तत्काळ तिकीट बुकिंगच्या वेळी वेबसाइट क्रॅश होण्याची समस्या कमी होणार आहे.