Black Magic Video : फोटोवर खिळा ठोकलेला, काळी बाहुली, हळद-कुंकू; व्हॅलेंटाइन डेला तरुणीवर जादूटोणा?

व्हॅलेंटाइन डे खरं तर प्रेम व्यक्त करण्याचा दिवस. या दिवशी जोडीदार आपल्या आवडत्या व्यक्तीबद्दल प्रेमभावना व्यक्त करतो. याच प्रेम व्यक्त करण्याच्या दिवशी कोल्हापुरात विचित्र प्रकार घडला आहे. एका तरुणीवर जादूटोणा केल्याचं सांगितलं जात आहे. तरुणीचा फोटो एका झाडाला खिळ्याने ठोकलेला आहे. तर त्यावर हळद आणि कुंकू तसेच काळी बाहुली लावलेली दिसते. या घटनेमुळं परिसरात खळबळ उडाली आहे.

कोल्हापूरच्या पन्हाळा तालुक्यातील कोडोली येथे हा धक्कादायक प्रकार घडलाय. आनंदनगर परिसरात व्हॅलेंटाईन डेला एका झाडावर तरुणीचा फोटो आणि काळी बाहुली हळद-कुंकू लावून खिळ्याने ठोकण्यात आल्याचे दिसून आले. हा प्रकार भानामतीसारखा असल्याची चर्चा परिसरात सुरू झाली. नागरिकांमध्ये भीतीचे वातावरण आहे. संबंधित प्रकारामागे नेमकं कोण आहे, याचा शोध घेण्याची मागणी नागरिकांकडून केली जात आहे. पोलिसांनी या प्रकरणाची दखल घेऊन चौकशी सुरू करावी, असे नागरिकांचे म्हणणे आहे.