भेंडवळ भविष्यवाणी २०२६: जूनमध्ये मुसळधार पाऊस आणि महापुराचे संकट; देशाची संरक्षण स्थिती तणावात राहणार

बुलढाणा: गेल्या ३७० वर्षांपासूनची प्रदीर्घ परंपरा असलेल्या बुलढाणा जिल्ह्यातील भेंडवळ येथील प्रसिद्ध 'घटमांडणी'चे भविष्य आज जाहीर करण्यात आले आहे. अक्षय तृतीयेच्या मुहूर्तावर करण्यात आलेल्या या घटमांडणीच्या निरीक्षणातून यंदाचा पाऊस, पीक-पाणी, देशाची आर्थिक आणि राजकीय स्थिती तसेच जागतिक संघर्षाबाबत महत्त्वाची भाकिते वर्तवण्यात आली आहेत.

हवामान आणि पावसाचा अंदाज:
भेंडवळच्या अंदाजानुसार, यंदा जून महिन्यात मुसळधार पाऊस पडेल, ज्यामुळे अनेक ठिकाणी महापुराचे संकट ओढवू शकते. मात्र, जुलैमध्ये पाऊस सर्वसाधारण असेल, तर ऑगस्ट आणि सप्टेंबरमध्ये पावसाचे प्रमाण कमी राहण्याची शक्यता आहे.

शेती आणि पिकांची स्थिती:

भरघोस पिके: यंदा कापूस, तांदूळ, तीळ आणि बाजरीचे उत्पादन मोठ्या प्रमाणावर होईल.

मध्यम पिके: ज्वारी, तूर, मूग, उडीद, मटकी, वाटाणा आणि जवस ही पिके सर्वसाधारण येतील.

पिकांवर रोगराई पडण्याचे प्रमाण अधिक असेल, असा इशाराही देण्यात आला आहे.

देशाची राजकीय आणि आर्थिक स्थिती:
भविष्यावाणीनुसार, देशाची आर्थिक स्थिती यंदा फारशी मजबूत नसेल. राजकीय क्षेत्रात 'राजा कायम असेल' (सत्ताधारी कायम राहतील) असे संकेत मिळाले आहेत. मात्र, देशाच्या संरक्षण व्यवस्थेवर मोठा ताण असेल आणि सीमांवर तणावाची स्थिती निर्माण होऊ शकते. तसेच इराण-अमेरिका संघर्षाच्या पार्श्वभूमीवर जागतिक पातळीवरही अशांततेचे सावट राहण्याची शक्यता वर्तवण्यात आली आहे.

बुलढाणा, खान्देश, मराठवाडा आणि मध्य प्रदेशातील हजारो शेतकरी या भविष्यवाणीच्या आधारे आपल्या शेतीचे नियोजन करत असतात. पुंजाराजी महाराज आणि वाघ घराण्याद्वारे ही परंपरा आजही श्रद्धेने जपली जात आहे.