पुणे: अजितदादा खूप मोठ्या मनाचे होते, पण मी दादांसारखी नाही; पुरुषोत्तम जगतापांना लक्ष्य करत सुनेत्रा पवारांचा कडक इशारा!

पुणे: जिल्ह्यातील अत्यंत प्रतिष्ठेच्या आणि राज्याचे लक्ष लागून राहिलेल्या श्री सोमेश्वर सहकारी साखर कारखान्याच्या पंचवार्षिक निवडणुकीच्या निमित्ताने बारामती तालुक्यात राजकीय वातावरण चांगलेच तापले आहे. निवडणुकीच्या प्रचाराचा नारळ फुटल्यानंतर उपमुख्यमंत्री सुनेत्रा पवार यांनी थेट विरोधकांवर आणि बंडखोरांवर अत्यंत आक्रमक शब्दांत हल्लाबोल केला. विशेष म्हणजे, स्वतंत्र पॅनेल उभे करणारे आणि कारखान्याचे माजी अध्यक्ष पुरुषोत्तम जगताप यांच्याच वाणेवाडी गावात पहिली जाहीर सभा घेत सुनेत्रा पवार यांनी विरोधकांना सज्जड दम भरला आहे.

काय म्हणाल्या सुनेत्रा पवार? या सभेत बोलताना उपमुख्यमंत्री सुनेत्रा पवार भावूक झाल्या, तसेच त्यांनी विरोधकांच्या भूमिकेवर तीव्र संताप व्यक्त केला. त्या म्हणाल्या की, "आदरणीय अजितदादा हे अत्यंत विशाल मनाचे आणि मोठ्या मनाचे नेते होते, त्यांच्या स्वभावात सगळयांना सामावून घेण्याची मोठी वृत्ती होती. परंतु, मी दादांसारखी नाही!" असे स्पष्ट शब्दांत सांगत त्यांनी बंडखोरांना आणि विरोधकांना कडक इशारा दिला आहे. स्वतःच्या कर्तृत्वावर आणि ताकदीवर निवडणूक लढवण्याची हिंमत असेल, तर त्यांनी प्रचारात अजितदादांचे नाव आणि त्यांचे फोटो वापरणे तात्काळ बंद करावे, असा थेट सवाल त्यांनी उपस्थित केला.

सोमेश्वर निवडणुकीत राजकारणाचा रंग: सोमेश्वर सहकारी साखर कारखाना हा केवळ एक कारखाना नसून तो हजारो शेतकरी सभासदांच्या कष्टाची आणि विश्वासाची शिदोरी आहे. अनेक पिढ्यांपासून या संस्थेने शेतकऱ्यांच्या हिताचे रक्षण केले आहे. अशा या सहकार क्षेत्रातील महत्त्वाच्या संस्थेच्या निवडणुकीत कोणत्याही प्रकारच्या राजकीय स्वार्थाची गरज नव्हती. मात्र, दुर्दैवाने या निवडणुकीला राजकीय रंग देण्यात आला, अशी खंत त्यांनी व्यक्त केली. अजितदादांच्या पश्चात होत असलेल्या या निवडणुकीत काही मंडळी स्वतःच्या फायद्यासाठी दादांचे नाव वापरतात आणि अंतर्गत राजकारण करतात, हे सहन केले जाणार नाही, असे त्यांनी स्पष्ट केले.

सभासदांच्या हिताचा आणि विश्वासाचा मुद्दा: सुनेत्रा पवार पुढे म्हणाल्या की, दादांचा सोमेश्वर कारखान्यावर पोटच्या मुलासारखा जीव होता. या कारखान्याला उभे करण्यासाठी आणि उच्च दर्जावर नेण्यासाठी त्यांनी आपले आयुष्य आणि आमदारकी पणाला लावली होती. आज काही लोक या विकासाचे श्रेय स्वतःकडे घेत आहेत, परंतु हा कारखाना कोणड्या एका व्यक्तीची मालमत्ता नसून तो हजारो शेतकरी सभासदांचा घाम आणि कष्टाचे फलित आहे. येत्या ११ तारखेला होणाऱ्या मतदान प्रक्रियेत सभासदांनी कपबशी चिन्हावर मतदान करून सोमेश्वरची परंपरा आणि स्वाभिमान कायम ठेवावा, असे आवाहन त्यांनी केले. या सभेत त्यांनी निवडणुकीनंतर सर्व विजयी उमेदवारांना विश्वासात घेऊनच अध्यक्षपदाचा निर्णय घेतला जाईल, असा शब्दही दिला.