छत्रपती संभाजीनगरमध्ये सायबर गुन्हेगारांचा थरारक पैलू; वृद्ध माऊली दीड महिना 'डिजिटल अरेस्ट', ९३ लाख ५० हजारांचा गंडा

छत्रपती संभाजीनगर: शहरातील जवाहर कॉलनी परिसरातून आतापर्यंतचा अत्यंत खळबळजनक आणि चक्रावून टाकणारा सायबर गुन्‍ह्याचा प्रकार समोर आला आहे. येथील एका ७३ वर्षीय वृद्ध महिलेला सायबर चोरांनी थोडे-थोडके दिवस नाही, तर तब्बल दीड महिना 'डिजिटल अरेस्ट' (Digital Arrest) मध्ये ओलीस ठेवले होते. या दीड महिन्यांत भीती दाखवून तोतया अधिकाऱ्यांनी या वृद्धेकडून तब्बल ९३ लाख ५० हजार रुपये उकळले. ही वृद्ध महिला जेव्हा अमेरिकेत (US) राहणाऱ्या आपल्या मुलांकडे गेली, तेव्हा या संपूर्ण आंतरराष्ट्रीय सायबर दरोड्याचा धक्कादायक पर्दाफाश झाला आहे.

असा रचला कट; तोतया आयपीएस बनून केला कॉल
पोलिसांनी दिलेल्या माहितीनुसार, ८ डिसेंबर २०२५ रोजी या वृद्धेच्या व्हॉट्सॲपवर (WhatsApp) एक अनोळखी कॉल आला. फोनवरील महिलेने आपण दिल्लीतून 'बीएसएनएल' (BSNL) अधिकारी बोलत असल्याचे सांगून या वृद्धेचे सिमकार्ड बेकायदेशीर कृत्यांसाठी वापरले जात असल्याची भीती दाखवली. त्यानंतर तात्काळ हा कॉल एका व्हिडिओ कॉलवर ट्रान्सफर करण्यात आला. समोर पोलीस युनिफॉर्ममध्ये बसलेल्या एका व्यक्तीने स्वतःची ओळख दिल्लीचे आयपीएस अधिकारी 'सुनीलकुमार गौतम' अशी करून दिली.

दहशतवादी संबंधांची भीती आणि दीड महिना डिजिटल कैद
या तोतया आयपीएस अधिकाऱ्याने वृद्धेला धमकावले की, "तुमच्या बँक खात्यातून मनी लाँड्रिंग आणि दहशतवादी संघटनांना निधी पुरवला जात आहे. तुमच्या नावावर सर्वोच्च न्यायालयाचे अटक वॉरंट निघाले आहे." यामुळे वृद्ध महिला प्रचंड घाबरली. चोरांनी तिला कोणालाही न सांगण्याची कडक ताकीद दिली आणि स्काईप (Skype) किंवा व्हिडिओ कॉलवरून २४ तास नजर ठेवून 'डिजिटल अरेस्ट' केले. स्वतःची सुटका करून घेण्यासाठी आणि चौकशीच्या नावाखाली या टोळीने वृद्धेला वेगवेगळ्या बँक खात्यांवर एकूण ९३ लाख ५० हजार रुपये ट्रान्सफर करण्यास भाग पाडले.

अमेरिकेत मुलांनी उघड केले सत्य
या मानसिक त्रासामधून जात असतानाच, ही वृद्ध महिला नियोजित दौऱ्यानुसार अमेरिकेत राहणाऱ्या आपल्या मुलांकडे गेली. तिथे गेल्यावरही तिची भीती कमी झाली नव्हती. मुलांनी तिच्या बदललेल्या वागणुकीबद्दल विचारणा केली असता तिने रडत रडत हा सर्व प्रकार सांगितला. मुलांनी तात्काळ तपास केला असता, तो आयपीएस अधिकारी आणि त्यांनी पाठवलेली सर्वोच्च न्यायालयाची नोटीस संपूर्णपणे बोगस असल्याचे समोर आले. मुलांच्या सांगण्यावरून आता छत्रपती संभाजीनगर सायबर पोलीस ठाण्यात या आंतरराष्ट्रीय फसवणुकीविरुद्ध गुन्हा दाखल करण्यात आला असून पोलीस या प्रकरणाचा पुढील तपास करत आहेत.