Pune MHADA Lottery : हक्काचं घर घेण्याचं स्वप्न साकार! आज म्हाडाच्या 4,186 घरांची सोडत; पुण्यासह तीन जिल्ह्यांना मोठा फायदा

Pune : पुणे गृहनिर्माण क्षेत्रविकास मंडळाच्या (म्हाडा) पुणे विभागातील पुणे, पिंपरी चिंचवड तसेच सोलापूर, कोल्हापूर आणि सांगली जिल्ह्यातील चार हजार १८६ सदनिकांची सोडत आज, मंगळवारी होणार आहे. आचारसंहितेत अडकलेली ही सोडत अखेर आज होणार आहे.

MHADA तर्फे चार हजार १८६ सदनिकांसाठी सप्टेंबरमध्ये जाहिरात प्रसिद्ध करण्यात आली होती. स्थानिक स्वराज्य संस्थांच्या आचारसंहितेमुळे ही सोडत जाहीर करण्यात अडथळे निर्माण झाले होते. त्याबाबत ‘म्हाडा’ने सरकार आणि निवडणूक आयोगाकडे पत्रव्यवहार केला होता. अखेर या सोडतीला मुहूर्त मिळाला आहे. ‘म्हाडा’चे सभापती शिवाजीराव आढळराव पाटील यांच्या उपस्थितीत पुणे जिल्हा परिषदेच्या शरदचंद्र पवार सभागृहात ही सोडत आज सकाळी १२ वाजता होणार आहे. त्या वेळी ‘म्हाडा’चे मुख्य कार्यकारी अधिकारी संजीव जयस्वाल हे दूरदृश्य प्रणालीद्वारे उपस्थित राहणार आहेत.

एकूण चार हजार १८६ सदनिकांपैकी पुणे, पिंपरी चिंचवड, तसेच पुणे महानगर प्रादेशिक विकास प्राधिकरणांतर्गत २० टक्के, सर्वसमावेशक योजनेतील ३३२२ सदनिकांचा आणि १५ टक्के सामाजिक गृहनिर्माण योजनेतील ८६४ सदनिकांचा सोडतीमध्ये (MHADA Lottery) समावेश करण्यात आला आहे. सोडतीच्या ठिकाणी सर्व अर्जदारांनी उपस्थित राहावे. ज्यांना उपस्थित राहणे शक्य नाही त्यांनी ‘यूट्यूब’वरून या कार्यक्रमाची सोडत पाहण्याचे आवाहन मुख्य अधिकारी राहुल साकोरे यांनी केले.

कोथरूड-पौड रस्त्यावरील कृष्णा हॉस्पिटलजवळ ज्येष्ठ नागरिकांसाठी उभारलेला कट्टा कुलूपबंद असल्याने त्याचा उद्देश सफल होत नाहीये. महापालिका अनेक आकर्षक नावे देऊन प्रकल्प उभे करते, पण नंतर त्यांची देखभाल करत नाही. काही ठिकाणी तर हे कट्टे भिकाऱ्यांचे निवारे बनले आहेत. महापालिकेने सर्व कट्ट्यांची पाहणी करून ते ज्येष्ठ नागरिकांसाठी खुले करावेत, अशी मागणी होत आहे.
शिवाजी पठारे यांनी याबद्दल चिंता व्यक्त केली आहे. त्यांच्या मते, कोथरूड-पौड रस्त्यावर कृष्णा हॉस्पिटलजवळ ज्येष्ठ नागरिकांसाठी एक कट्टा बांधण्यात आला आहे. हा कट्टा ज्येष्ठ नागरिकांच्या सोयीसाठी आहे. पण दुर्दैवाने, हा कट्टा नेहमी कुलूपबंद असतो. त्यामुळे ज्या चांगल्या उद्देशाने हा कट्टा बांधला, तो पूर्ण होत नाहीये.