‘लापरवाही का नतीजा’, रोज डेच्या दिवशी पत्नीने नवऱ्याला दिलं गुलाब पण पोलिसांनी थेट दाखल केला गुन्हा, पत्नीची ती चूक ठरली कारणीभूत

Munger : सध्या सर्वत्र व्हॅलेंटाईन डे मोठ्या प्रमाणात साजरा होत आहे. पण या दिवसांमध्ये अशा काही घटना समोर आल्या आहेत, ज्या ऐकून तुमच्या देखील पाया खालची जमीन सरकेल. जर तुम्ही देखील व्हॅलेंटाईन डे बायको किंवा मैत्रिणींला गिफ्ट देत असाल तर ही बातमी नक्की वाचा.

बिहारमध्ये ‘रोज डे’ निमित्त पतीला गुलाब देत प्रेम व्यक्त करणाऱ्या एका महिलेचा व्हिडिओ सोशल मीडियावर व्हायरल झाल्यानंतर ती थेट कायदेशीर अडचणीत सापडली आहे. केवळ गुलाब देण्याचा प्रश्न नसून त्या व्हिडिओमध्ये दिसलेल्या काही गोष्टींमुळे हा प्रकार गंभीर बनला आहे. पोलिसांनी या प्रकरणी गुन्हा नोंदवून तपास सुरू केला आहे.

नेमकं व्हिडीओमध्ये काय?

व्हायरल व्हिडिओमध्ये संबंधित महिला कंचन देवी पतीला प्रथम गुलाबाचे फूल देते. त्यानंतर ती त्याला एका ग्लासमध्ये दारू ओतून देते आणि दारूची बाटलीही हातात देते असा हा सीन आहे. हा व्हिडिओ तिने स्वतः इंस्टाग्राम आणि फेसबुकवर पोस्ट केला आहे. बिहार राज्यात दारूबंदी कायदा लागू असल्याने सार्वजनिकरीत्या दारूचे सेवन किंवा त्याचे प्रदर्शन हा कायदेशीर गुन्हा ठरतो. त्यामुळे हा व्हिडिओ व्हायरल होताच सोशल मीडियावर चर्चेला उधाण आले आणि पोलिसांनी तत्काळ कारवाई केली.

या प्रकरणाला आणखी वळण मिळाले ते म्हणजे कंचन देवी यांचा आणखी एक फोटो समोर आल्याने ज्यात त्या एका ब्युटी पार्लरमध्ये हातात पिस्तूल घेऊन पोझ देताना दिसत आहेत. या फोटोमुळे प्रकरण अधिक गंभीर बनले. व्हिडिओ आणि फोटो व्हायरल होताच मुंगेर पोलिसांनी हालचाल सुरू केली. मुंगेरचे पोलीस अधीक्षक सैयद इमरान मसूद यांनी घटनेची पुष्टी करत सांगितले की माहिती मिळताच सदर एसडीपीओ यांच्या नेतृत्वाखाली विशेष पथक स्थापन करण्यात आले.

पोलिसांनी तातडीने छापा टाकून चौकशी केली असता फोटोमध्ये दिसणारे पिस्तूल दीनदयाल चौक येथील विशाल कुमार नावाच्या व्यक्तीचे परवानाधारक शस्त्र असल्याचे उघड झाले. कंचन देवी यांनी त्या परवानाधारक शस्त्रासोबत फोटो काढून सोशल मीडियावर पोस्ट केला होता. जो शस्त्र नियमांचे उल्लंघन मानला जात आहे.

या प्रकरणी पोलिसांनी कंचन देवी आणि शस्त्राचे मालक विशाल कुमार यांच्याविरोधात संबंधित कलमांनुसार गुन्हा नोंदवला आहे. सार्वजनिक ठिकाणी शस्त्रांचे प्रदर्शन करणे आणि प्रतिबंधित पदार्थांचे प्रोत्साहन देणे हे कायद्याने दंडनीय असल्याचे एसपींनी स्पष्ट केले.