भाईंदर : शहर प्रमुख पप्पू भिसे यांना महिला शिवसैनिकांकडून मारहाण; गुन्हा दाखल

भाईंदर पश्चिमेच्या पोलिस ठाण्यासमोर शिवसेनेची शाखा आहे. भाईंदर पश्चिमेच्या शहर प्रमुखपदी पप्पू भिसे यांची नियुक्ती करण्यात आली होती. मात्र काही शिवसैनिकांनी त्यांना विरोध केला. सूत्रांनी दिलेल्या माहितीनुसार, रविवारी दुपारच्या सुमारास महिला शिवसैनिक वैदही परुळेकर या शिवसेना शाखेत आल्या. त्यावेळी पदाधिकारी यांच्या खुर्चीवर बसल्या असता शहरप्रमुख पप्पू भिसे यांनी विरोध केला. त्यानंतर शाब्दीक चकमक झाली आणि वैदही परुळेकर निघून गेल्या. थोड्यावेळाने तीन-चार महिलांसोबत शाखेत आल्या आणि पप्पू भिसे यांची कॉलर पकडून बाहेर आणून मारहाण केली. त्याचा व्हिडिओ सोशल मीडियावर व्हायरल झाला आहे. याप्रकरणी कोणालाही अटक झाली नाही. अशी माहिती भाईंदर पोलीस ठाण्याचे वरिष्ठ पोलीस निरीक्षक मुगुटराव पाटील यांनी दिली.