बुलेट मोटरसायकल चोरीच्या आरोपाखाली मराठी अभिनेत्याला अटक; 5 बाईक जप्त

रॉयल एनफिल्ड बुलेट मोटरसायकल चोरल्याच्या आरोपाखाली मुंबईतील टिळकनगर पोलिसांनी एका मराठी अभिनेत्याला अटक केली आहे. आरोप 32 वर्षांचा असून तो रील स्टार आणि मराठी टीव्ही अभिनेता असल्याचं समजतंय. त्याच्याकडून पोलिसांनी पाच रॉयल एनफिल्ड मोटरसायकल जप्त केल्या आहेत. सुनील उर्फ रेहान सुभाष चौधरी असं अटक केलेल्या आरोपीचं नाव आहे. पोलिसांनी दिलेल्या माहितीनुसार, चौधरी हा जळगाव जिल्ह्यातील मुक्ताईनगर तालुक्याचा रहिवासी आहे. सध्या तो पत्नीसोबत बदलापूर पूर्व इथे राहतो.

सोशल मीडियावर रील्स क्रिएटर म्हणून ओळखल्या जाणाऱ्या रेहानने अनेक मराठी दूरचित्रवाणी मालिका आणि चित्रपटांमध्ये छोट्या भूमिकाही केल्या आहेत. ही घटना 21 जानेवारी रोजी समोर आली, जेव्हा कुर्ला पश्चिम इथले रहिवासी संदीप ओमप्रकाश सोनकर यांनी टिळकनगर रेल्वे स्टेशनजवळील एल. आर. उड्डाणपूल परिसरातून आपली बुलेट मोटरसायकल चोरी झाल्याची तक्रार केली. या तक्रारीनंतर टिळक नगर पोलिसांनी अज्ञात व्यक्तीविरोधात चोरीचा गुन्हा दाखल केला होता.

वरिष्ठ पोलीस निरीक्षक संतोष ढेमरे आणि पोलीस निरीक्षक संगम गुरसाळे यांच्या मार्गदर्शनाखाली, सहाय्यक पोलीस निरीक्षक राहुल वाघमारे यांच्या नेतृत्वाखालील पथकाने तपास सुरू केला. परिसरातील सीसीटीव्ही फुटेज आणि तांत्रिक पाळत ठेवून पोलिसांनी आरोपीला बदलापूर पूर्व इथून अटक केली.

आरोपीवर मुंबईत जवळपास 17 मोटरसायकल चोरीचे गुन्हे नोंद असल्याचीही धक्कादायक माहिती तपासादरम्यान समोर आली आहे. रेहानला पकडण्यासाठी पोलिसांनी बदलापूरमध्ये सापळा रचला होता. सापळा रचून त्याला ताब्यात घेण्यात पोलिसांना यश मिळालं. नंतर चौकशीदरम्यान त्याने गुन्ह्याची कबुली दिली. यावेळी वेगवेगळ्या गुन्ह्यातील पाच रॉयल एनफिल्ड बुलेट मोटरसायकल त्याच्याकडून जप्त करण्यात आल्या आहेत.

गेल्या काही वर्षांपासून आरोपी रेहान या बुलेट मोटरसायकल चोरी करून त्या विविध शहरांमध्ये विकत असल्याची माहिती तपासादरम्यान समोर आली. सोशल मीडियावर रील्स पोस्ट करून त्याने आपला चाहतावर्ग निर्माण केला होता. तर दुसरीकडे अभिनेता म्हणून ओळख निर्माण केली, जेणेकरून कोणाला त्याच्यावर संशय येऊ नये.