पोलीस स्टेशनसमोरच दोन उमेदवारांच्या समर्थकांमध्ये फ्री स्टाईल हाणामारी|VIDEO

छत्रपती संभाजीनगर : जिल्ह्यातील गंगापूर शहरात जिल्हा परिषद निवडणुकीच्या पार्श्वभूमीवर तणावाचे वातावरण निर्माण झाले आहे. जामगाव सर्कलमधील शिंदे गटाचे उमेदवार निरपळ आणि अपक्ष उमेदवार मुंदडा समर्थक यांच्यात चक्क पोलीस ठाण्याच्या आवारात, पोलिसांच्या उपस्थितीतच फ्री स्टाईल हाणामारी झाल्याची घटना घडली.

काल मतदानाच्या दिवशी दोन्ही गटांमध्ये वाद झाला होता. या वादाच्या अनुषंगाने आज दोन्ही बाजूंचे कार्यकर्ते तक्रार देण्यासाठी गंगापूर पोलीस ठाण्यात आले होते. मात्र पोलीस ठाण्याच्या आवारातच दोन्ही गटांचे समर्थक मोठ्या संख्येने जमा झाले आणि शाब्दिक वादाचे रूपांतर थेट मारहाणीत झाले.

पोलीस ठाण्याच्या परिसरातच गोंधळ आणि राडा झाल्याने काही काळ तणावाचे वातावरण निर्माण झाले. घटनेची माहिती मिळताच पोलिसांनी हस्तक्षेप करत परिस्थिती नियंत्रणात आणली. या प्रकरणी पुढील कारवाई सुरू असून संबंधितांवर गुन्हा दाखल करण्याची प्रक्रिया सुरू असल्याची माहिती पोलीस सूत्रांनी दिली आहे.