हर्षवर्धन सपकाळांच्या विरोधात पुण्यात भाजप- काँग्रेसचे आंदोलक आक्रमक

पुण्यात हर्षवर्धन सपकाळ यांच्या वक्तव्यावरून भाजप आणि काँग्रेस कार्यकर्त्यांमध्ये तीव्र संघर्ष झाला. पुणे काँग्रेस भवनसमोर भाजपच्या कार्यकर्त्यांनी सपकाळ यांच्या विरोधात आंदोलन सुरू केले, तर काँग्रेसचे कार्यकर्ते सपकाळ यांच्या समर्थनार्थ आणि भाजपच्या विरोधात रस्त्यावर उतरले. या आंदोलनादरम्यान दोन्ही बाजूंनी जोरदार घोषणाबाजी करण्यात आली, ज्यामुळे परिस्थिती तणावपूर्ण बनली. पोलिसांकडून जमावाला पांगवण्याचा प्रयत्न करण्यात आला, मात्र कार्यकर्ते ऐकण्याच्या मनस्थितीत नव्हते.

यावेळी कार्यकर्त्यांमध्ये मोठा गोंधळ निर्माण झाला. दोन्ही बाजूंनी एकमेकांवर दगडफेक आणि बाटल्या फेकण्यात आल्या. यामुळे परिसरात मोठ्या प्रमाणात तणाव निर्माण झाला. काँग्रेसने आरोप केला आहे की, भाजप कार्यकर्त्यांनी दगडफेक केली, ज्यामुळे त्यांच्या गाड्या फुटल्या आणि काही कार्यकर्ते जखमी झाले. काँग्रेसने पोलिसांवर पक्षपाताचा आरोप करत हस्तक्षेप न केल्याबद्दल नाराजी व्यक्त केली. एकूणच, सपकाळ यांच्या वक्तव्यावरून पुण्यात राजकीय संघर्ष तीव्र झाल्याचे चित्र होते.