बलात्कार पीडित साकारताना अभिनेत्रीला जाणवल्या या वेदना; चित्रपट पाहून अंगावर येईल काटा!

दिग्दर्शक अनुभव सिन्हा हे सामाजिक मुद्द्यांवरील चित्रपटांसाठी ओळखले जातात. ‘मुल्क’, ‘थप्पड’, ‘आर्टिकल 15’ आणि ‘भीड’ या चित्रपटांनंतर आता ते ‘अस्सी’ हा चित्रपट प्रेक्षकांच्या भेटीला घेऊन आले आहेत. यामध्ये एका बलात्कार पीडिताची कथा दाखवण्यात आली आहे. या चित्रपटात तापसी पन्नू, कुमूद मिश्रा, झिशान अयूब, मनोज पाहवा, रेवती अशा दमदार कलाकारांच्या भूमिका आहेत. ‘अस्सी’मध्ये मल्याळम अभिनेत्री कनी कुश्रुतीने बलात्कार पीडित परिमाची भूमिका साकारली आहे. कनी कुश्रुती हे मल्याळम चित्रपटसृष्टीतील एक प्रसिद्ध नाव आहे. अत्यंत कमी वेळात तिने आपली वेगळी ओळक निर्माण केली आहे. कनीने हुमा कुरैशीच्या ‘महारानी’ या वेब सीरिजमध्येही दमदार भूमिका साकारली होती. आता ती ‘अस्सी’मधून प्रेक्षकांच्या भेटीला येणार असून सोशल मीडियावर तिची बरीच चर्चा आहे. नुकत्याच दिलेल्या एका मुलाखतीत कनीने तिच्या भूमिकेविषयी बरंच काही सांगितलं आहे.

अनुभव सिन्हा दिग्दर्शित ‘अस्सी’ या चित्रपटातील बलात्कार पीडित साकारताना तिने त्या वेदना कशा अनुभवल्या, याविषयी कनी मोकळेपणे व्यक्त झाली. ‘पीटीआय’ या वृत्तसंस्थेला दिलेल्या मुलाखतीत ती म्हणाली, “मला वाटत नाही की, कोणताही अभिनेता किंवा अभिनेत्री एका पीडितेच्या वेदनांना त्याच तीव्रतेने समजू शकत नाहीत. त्या वेदनेजवळ पोहोचण्याचा आम्ही पूर्ण प्रयत्न करतो. कधी कधी असं वाटतं की जणू ती घटना माझ्यासोबतच घडली आहे. कारण त्यावर तितका विश्वास ठेवून ती भूमिका साकारावी लागते. परंतु मी अशी अभिनेत्री नाही, जी तिच्या भूमिकेत पूर्णपणे बुडून जाते. कारण असं केलं तर त्याला वाईट परिणाम माझ्यावर होईल. त्यामुळे मी ते होऊ देत नाही.”

याविषयी तिने पुढे सांगितलं, “मी या देशात लहानाची मोठी झाले. त्यामुळे मला अशा घटनांच्या ट्रॉमाची (मानसिक धक्का) जाणीव आहे का? तर हो, थोडंफार आहे. कारण माझ्या अनेक जवळच्या लोकांनी अशा घटनांचा सामना केला आहे. त्यामुळे ती घटना वारंवार तुमच्याशी जोडून राहते. मग तुमची इच्छा असो किंवा नसो. न्याय मिळवण्यासाठी तुम्हाला वेदनेतून जावंच लागतं. ही व्यवस्थेबद्दलची एक अतिशय विचित्र आणि विडंबनात्मक गोष्ट आहे. पण जेव्हा न्याय अशाच पद्धतीने मिळतो, जो तुम्ही विसरू शकत नाही. या चित्रपटात एक संवाद आहे की, ते तुम्हाला ही गोष्ट विसरू देणार नाहीत.” ‘अस्सी’ हा चित्रपट येत्या 20 फेब्रुवारी रोजी थिएटरमध्ये प्रदर्शित होणार आहे.