उद्धव ठाकरे आणि शरद पवार पुन्हा सभागृहात जाणार? मविआची रणनीती

महाराष्ट्राच्या राजकारणात सध्या एक महत्त्वाची चर्चा सुरू आहे.  उद्धव ठाकरे पुन्हा विधानपरिषदेवर जाणार का आणि शरद पवार राज्यसभेचे सदस्य म्हणून परतणार का. संजय राऊत यांनी या चर्चांना सुरुवात केली आहे. महाविकास आघाडीकडे सध्या विधानपरिषद आणि राज्यसभा मिळून केवळ दोनच जागा निवडून आणण्याइतके संख्याबळ आहे. त्यामुळे या दोन जागांसाठी उमेदवार कोण असतील, याबाबत रणनीती आखली जात आहे.

उद्धव ठाकरे यांचा विधान परिषदेचा कार्यकाळ 13 मे 2026 रोजी संपणार आहे, मात्र संख्याबळाच्या कमतरतेमुळे त्यांच्यासमोर आव्हान उभे ठाकले आहे. येत्या मे महिन्यात विधान परिषदेच्या नऊ जागा रिक्त होणार असून, त्यापैकी महाविकास आघाडी केवळ एका जागेवर निवडून येऊ शकते. राज्यसभेच्या सात जागांपैकीही महाविकास आघाडी एकच जागा जिंकू शकते. अशा स्थितीत काँग्रेस आणि शरद पवार गटाचा पाठिंबा उद्धव ठाकरे यांना विधान परिषदेत जाण्यासाठी आवश्यक आहे. त्याचप्रमाणे शरद पवार यांच्या राज्यसभेच्या मुदतीचा कालावधी 2 एप्रिल रोजी संपणार आहे. त्यांची इच्छा असल्यास, महाविकास आघाडी त्यांना पुन्हा राज्यसभेवर पाठवण्यासाठी सक्षम असल्याचा विश्वास संजय राऊत यांनी व्यक्त केला आहे. दोन्ही नेत्यांचे भवितव्य महाविकास आघाडीतील पक्षांच्या एकजुटीवर अवलंबून असेल.