अमित शाह यांच्या सुरक्षेत मोठी चूक, फडणवीसांच्या निवासस्थानी त्यांच्याभोवती फिरत होती अज्ञात व्यक्ती, मुंबई पोलिसांकडून अटक

केंद्रीय गृहमंत्री अमित शाह यांच्या मुंबई दौऱ्यात मोठी चूक झाल्याचं समोर आलं आहे. अमित शाह दोन दिवसांच्या मुंबई दौऱ्यावर असताना एक अज्ञात व्यक्ती सुरक्षा भेदत त्यांच्यापर्यंत पोहोचली होती. पोलिसांनी दिलेल्या माहितीनुसार, ही व्यक्ती उपमुख्यमंत्री देवेंद्र फडणवीस यांच्या शासकीय निवासस्थानी अमित शाह आणि इतर राजकीय नेत्यांच्या भोवती वावरत होती. टाइम्स ऑफ इंडियाच्या वृत्तानुसार, आंध्र प्रदेशातील खासदाराचा पीए असल्याचा दावा करणाऱ्या या व्यक्तीला मलबार हिल पोलिसांनी अटक केली आहे.

हेमंत पवार असं या ३२ वर्षीय व्यावसायिकाचं नाव असून, त्याला बेड्या ठोकण्यात आल्या आहेत. पोलिसांनी दिलेल्या माहितीनुसार, हेमंत पवार मूळचा धुळ्याचा असून एका खासदाराचा पीए असल्याचा दावा करत आहे. त्याला मंत्र्यांची भेट घेत त्यांच्यासोबत फोटो काढण्याची इच्छा होती. प्रसिद्धी किंवा फायद्यासाठी हे फोटो तो वापरणार होता असा संशय आहे.