पालघर: वाऱ्यामुळे विस्कटलेले केस बांधताना आईच्या कुशीतून खाली पडली चिमुकली; उपचारादरम्यान मृत्यू.

पालघर: नालासोपारा येथे एका दुर्दैवी घटनेत अवघ्या एक वर्षाच्या चिमुकलीचा धावत्या दुचाकीवरून पडून मृत्यू झाला. वाऱ्यामुळे विस्कटलेले केस बांधण्याचा प्रयत्न करताना आईच्या हाताची पकड सैल झाल्याने ही दुर्घटना घडली. या घटनेमुळे संपूर्ण परिसरात हळहळ व्यक्त केली जात असून भास्वर कुटुंबावर दुःखाचा डोंगर कोसळला आहे.

नेमकी घटना काय? मिळालेल्या माहितीनुसार, योगेश भास्वर (३५) हे शुक्रवारी दुपारी १:१५ च्या सुमारास आपल्या पत्नी आणि एक वर्षाची मुलगी कृष्णा हिच्यासोबत दुचाकीवरून तिवरी रोडने प्रवास करत होते. योगेश दुचाकी चालवत होते, तर त्यांची पत्नी मागे बसून कृष्णाला आपल्या कुशीत घेऊन होती. प्रवासादरम्यान वाऱ्याच्या वेगामुळे आईचे केस विस्कटले. मुलीला मांडीवर घेतलेले असतानाच, आईने विस्कटलेले केस बांधण्याचा प्रयत्न केला. याच प्रयत्नात तिचे मुलीवरील लक्ष विचलित झाले आणि तिची हाताची पकड सैल झाली. यामुळे, आईच्या कुशीतून चिमुकली कृष्णा थेट चालत्या दुचाकीवरून रस्त्यावर खाली कोसळली.

उपचारादरम्यान मृत्यू: अपघातात कृष्णाला गंभीर दुखापत झाली होती. तिला तातडीने उपचारासाठी मुंबईतील केईएम (KEM) रुग्णालयात दाखल करण्यात आले. डॉक्टरांनी तिला वाचवण्यासाठी शर्थीचे प्रयत्न केले, मात्र शुक्रवारी रात्री उपचारादरम्यान कृष्णाची प्राणज्योत मालवली. या दुर्दैवी घटनेची नोंद नायगाव पोलीस ठाण्यात करण्यात आली असून, पोलिसांनी अपघाती मृत्यूची नोंद केली आहे. पोलीस या प्रकरणाचा अधिक तपास करत आहेत.