Pune : पुण्यात मोठा राडा; भाजप कार्यकर्ता दगड फेकताना कॅमेऱ्यात कैद, VIDEO

राज्याच्या राजकारणात खळबळ उडवणारी बातमी समोर आली आहे. काँग्रेस प्रदेशाध्यक्ष हर्षवर्धन सपकाळ यांनी टिपू सुलतान यांची तुलना छत्रपती शिवाजी महाराज यांच्याशी केली. त्यानंतर संतापलेल्या भाजप कार्यकर्त्यांनी रविवारी पुण्यातील काँग्रेस भवनासमोर जोरदार आंदोलन केले. भाजपच्या शेकडो कार्यकर्त्यांनी एकत्र येऊन काँग्रेसच्याविरोधात जोरदार घोषणाबाजी केली तसेच सपकाळ यांच्या प्रतिमेला जोडे मारले.

यावेळी भाजप कार्यकर्ते काँग्रेस भवनामध्ये घुसण्याचा प्रयत्न करत होते. मात्र पोलिसांचा प्रचंड फौजफाटा असल्याने भाजप कार्यकर्ते आतमध्ये शिरू शकले नाहीत. तसेच पोलिसांनी कोणताही अनुचित प्रकार घडू नये म्हणून हस्तक्षेप करण्याचा प्रयत्न केला. काँग्रेसचे कार्यकर्तेही आक्रमक झाल्याने दोन्ही बाजूकडील पदाधिकारी एकमेकांसमोर आले. यावेळी झालेल्या झटापटीत कार्यकर्ते एकमेकांच्या अंगावर धावून गेले.

हा वाद इतका चिघळला की दोन्ही गटाच्या कार्यकर्त्यांनी आमनेसामने येऊन एकमेकांवर दगड भिरकावले. यावेळी तिथे उपस्थित असलेल्या पत्रकारांच्या एका कॅमेऱ्यात भाजप कार्यकर्ता दगडफेक करताना कैद झाला आहे. झालेल्या दगडफेकीत एक-दोन काँग्रेस कार्यकर्ते रक्तबंबाळ झाले. काँग्रेस नेते मोहन जोशी आणि प्रशांत जगताप यांनी भाजपच्या आंदोलनाचा निषेध केला.