USA vs NAM : अमेरिकेने चौथा सामना 31 धावांनी जिंकला, अ गटातून नामिबिया आऊट

USA vs NAM America won the fourth match by 31 runs Namibia was eliminated from Group A t20 world cup 2026Image Credit source: USA Cricket Twitter

टी20 वर्ल्डकप 2026 स्पर्धेत अमेरिका आणि नामिबिया यांच्यात महत्त्वपूर्ण सामना पार पडला. या सामन्यातील पराभवामुळे नामिबियाचं स्पर्धेतील आव्हान संपुष्टात आलं आहे. तर अमेरिकेचं गणित जर तर वर असणार आहे. अमेरिकेने नाणेफेकीचा कौल जिंकला आणि प्रथम फलंदाजी करण्याचा निर्णय घेतला. हा निर्णय योग्यच होता असंच म्हणावं लागेल. अमेरिकेने 20 षटकात 4 गडी गमवून 199 धावा केल्या. तसेच विजयासाठी 200 धावांचं आव्हान दिलं. हे आव्हान काही नामिबियाला गाठता आलं नाही. हातात विकेट होत्या. पण धावांचं पाठलाग करताना चेंडू आणि धावांचं अंतर वाढलं. दडपण वाढल्याने वेगाने धावा करण्याच्या नादात काही विकेट गमावल्या आणि हातून सामना गमावला. अमेरिकेने हा सामना 31 धावांनी जिंकला. अमेरिकेचा या स्पर्धेतील हा दुसरा विजय असून अजूनही सुपर 8 फेरीच्या आशा कायम आहेत. या भारत, पाकिस्तान आणि नेदरलँड हे संघही आहेत.

टी20 वर्ल्डकप स्पर्धेतील या सामन्यात अमेरिकेकडून मोनांक पटेल आणि शायन जहांगीर यांनी सावध सुरूवात केली. या जोडीने पावर प्लेमध्ये एकही विकेट न गमावता 65 धावांची भागीदारी केली. संघाच्या 68 धावा असताना शायन जहांगीर बाद झाला. मोनांक पटेल 30 चेंडूत 52 धावा करून तंबूत परतला. तेव्हा संघाच्या 10.2 षटकात 89 धावा झाल्या होत्या. साईतेजा मुक्कमल्लाने 18 चेंडूत 17 धावांची खेळी केली. तर मिलिंद कुमार 20 चेंडूत 28 धावा करून बाद झाला. पण असं असताना संजय कृष्णमूर्तीने एका बाजूने डाव सावरला. त्याने 33 चेंडूत 6 षटकार आणि 4 चौकार मारत नाबाद 68 धावा केल्या. त्याच्या या खेळीमुळे अमेरिकेला मोठी धावसंख्या उभारता आली. शुभम रांजनेने 2 चेंडूचा सामना केला आणि नाबाद 5 धावांवर राहिला.

विजयी धावांचा पाठलाग करताना नामिबियाने चांगली सुरुवात केली. पावरप्लेमध्ये 1 गडी गमवून 57 धावा केल्या. जवळपास अमेरिकेसारखी स्थिती होती. तर 99 धावा असातना दुसरी विकेट गमावली. तेव्हा फक्त 10.3 षटकांचा खेळ झाला होता. त्यामुळे उर्वरित 10 षटकात असाच खेळ झाला तर नामिबिया सामना पालटू शकते असं वाटत होतं. पण तसं झालं नाही. लॉरेन स्टीनकॅम्प 58 आणि गेरहार्ड इरास्मस 6 धावा करून तंबूत परतले. त्यानंतर हा सामना पूर्णपणे अमेरिकेच्या हातात गेला. आता अमेरिकेचे साखळी फेरीत सर्व सामने संपले आहेत. आता सुपर 8 फेरीचं गणित जर तर वर असेल.