Bus Carrying SEEPZ Employees Plunges into Gorge, Two Dead

पुणे: राजगड किल्ल्यावर ट्रेकिंगसाठी निघालेल्या मुंबईतील सिप्झ (SEEPZ) कर्मचाऱ्यांच्या खासगी बसला पाबे घाटात भीषण अपघात झाला आहे. रविवारी मध्यरात्री १ वाजण्याच्या सुमारास चालकाचे बसवरील नियंत्रण सुटल्याने ही बस सुमारे ४० फूट खोल दरीत कोसळली. या दुर्दैवी घटनेत मुंबईतील दोघांचा जागीच मृत्यू झाला असून, १८ जण जखमी झाले आहेत.

नेमकी घटना काय?
अंधेरी येथील सिप्झमधील ज्वेलरी कंपनीत काम करणारे १९ कर्मचारी शनिवारी (२७ जून) संध्याकाळी साडेसात वाजता बसने राजगड किल्ला पाहण्यासाठी निघाले होते. पाबे घाटातून जात असताना एका वळणावर चालकाचा बसवरील ताबा सुटला आणि बस संरक्षक कठडा तोडून सुमारे ४० फूट खाली दरीत कोसळली. सुदैवाने, बस एका झाडाला अडकल्याने मोठी जीवितहानी टळली. बस उलटल्यामुळे अनेक प्रवासी सीटखाली अडकून पडले होते.

मृत आणि जखमींची माहिती:
अपघातात मृत्युमुखी पडलेल्या तरुणांची नावे विश्वास बाबूराव सातिम (२५, रा. विलेपार्ले) आणि ध्वनी चंद्रेश ठक्कर (२३, रा. कांदिवली) अशी आहेत. या अपघातात जखमी झालेल्या १८ जणांमध्ये नऊ महिलांचा समावेश आहे. जखमींवर वेल्हे ग्रामीण रुग्णालय आणि पुण्यातील खासगी रुग्णालयात उपचार सुरू आहेत. जखमी हे अंधेरी, नालासोपारा, चुनाभट्टी, मानखुर्द, भांडुप, विलेपार्ले, डोंबिवली, विरार आणि जोगेश्वरी या भागांतील रहिवासी आहेत.

पोलिस कारवाई:
अपघाताची माहिती मिळताच ११२ क्रमांकावर फोन करून स्थानिकांनी मदतीसाठी धाव घेतली. क्रेनच्या साहाय्याने बचावकार्य करून प्रवाशांना बाहेर काढण्यात आले. या प्रकरणी गिरीश रवींद्र जंगम यांच्या फिर्यादीवरून वेल्हे पोलिस ठाण्यात बस चालक संदीप तुकाराम गायकवाड (४७, रा. अंधेरी पूर्व) याच्या विरोधात गुन्हा दाखल करण्यात आला आहे.