ट्विशा शर्मा मृत्यू प्रकरण: सीबीआयचा मोठा 'ट्विस्ट', सासरच्या घरी केले 'क्राइम सीन रिक्रिएशन'

भोपाळ: माजी मॉडेल आणि अभिनेत्री ट्विशा शर्मा हिच्या संशयास्पद मृत्यू प्रकरणाचा तपास आता एका निर्णायक वळणावर येऊन पोहोचला आहे. या प्रकरणाचा तपास करत असलेल्या 'सीबीआय'ने सोमवारी कटारा हिल्स येथील तिच्या सासरच्या घरी जाऊन गुन्ह्याची पार्श्वभूमी पुन्हा उभी केली (Crime Scene Recreation).

तपासादरम्यान, सीबीआयने फॉरेन्सिक तज्ज्ञांच्या मदतीने आणि डमीचा वापर करून १२ मे रोजी रात्री नक्की काय घडले असावे, याचा घटनाक्रम समजून घेण्यासाठी संपूर्ण घटनेचे प्रात्यक्षिक (रिक्रिएशन) केले. या वेळी सीबीआय कोठडीत असलेले ट्विशाचे पती समर्थ सिंग आणि तिची सासू गिरीबाला सिंग यांना घटनास्थळी नेण्यात आले होते. त्यांच्यासमोरच सीबीआयने डमीच्या माध्यमातून घटनेची उजळणी केली.

हुंड्यासाठी छळाचा आरोप ट्विशाच्या कुटुंबीयांनी आरोप केला आहे की, डिसेंबर २०२५ मध्ये तिच्या लग्नानंतर सासरच्या मंडळींकडून हुंड्यासाठी तिचा सातत्याने मानसिक आणि शारीरिक छळ केला जात होता. पोस्टमॉर्टम रिपोर्टमध्ये मृत्यूचे कारण गळफास लागल्याने झाल्याचे समोर आले असले, तरी तिच्या शरीरावर बोथट शस्त्राने मारहाण केल्याच्या जखमाही आढळल्या आहेत. या सर्व बाबींचा ताळमेळ बसवण्यासाठी सीबीआय आता या तपासातून ठोस पुरावे गोळा करत आहे.