ENG vs NEP : हलक्यात घ्यायचं काम नाय, हरले, पण रडवून सोडलं, इंग्लंडचा नेपाळ विरुद्ध 4 धावांनी विजय

आयसीसी टी 20i वर्ल्ड कप 2026 स्पर्धेत इंग्लंड त्यांच्या पहिल्याच सामन्यात सर्वात मोठ्या उलटफेरची शिकार होता होता राहिली. इंग्लंडने नवख्या असलेल्या नेपाळसमोर मुंबईतील वानखेडे स्टेडियममध्ये 185 धावांचं आव्हान ठेवलं होतं. नेपाळने या धावांचा पाठलाग करताना सडेतोड बॅटिंग करत शेवटपर्यंत जोरदार लढा दिला. नेपाळच्या फलंदाजांनी केलेल्या फटकेबाजीमुळे सामना रंगतदार स्थितीत पोहचला होता. नेपाळला मोठा उलटफेर करण्यासाठी शेवटच्या ओव्हरमध्ये 10 धावांची गरज होती. नेपाळने शेवटच्या बॉलपर्यंत लढा दिला. मात्र सॅम करन याने चिवट बॉलिंग केली. सॅमने 9 धावांचा यशस्वी बचाव केला. नेपाळला शेवटच्या बॉलवर 6 धावांची गरज होती. तेव्हा सॅमने हुशारीने बॉल टाकला आणि अवघी 1 धाव दिली. इंग्लंडने अशाप्रकारे आपली लाज राखली आणि 4 धावांनी विजय मिळवला. तर नेपाळची झुंज अपयशी ठरली. मात्र नेपाळने या कामगिरीसह चाहत्यांची मनं जिंकली.

सामन्याचा धावता आढावा

इंग्लंडने टॉस जिंकून पहिले बॅटिंग केली. इंग्लंडसाठी जेकब बेथल आणि कॅप्टन हॅरी ब्रूक या दोघांनी सर्वाधिक धावा केल्या. जेकबने 55 आणि हॅरीने 53 धावांची खेळी केली. जोस बटलर याने 26 धावांचं योगदान दिलं. तर अखेरच्या क्षणी विल जॅक्स याने 18 बॉलमध्ये 39 रन्सची खेळी करत फिनिशिंग टच दिला. इंग्लंडने अशाप्रकारे 7 विकेट्स गमावून 184 धावा केल्या. नेपाळसाठी दीपेंद्र सिंह आयरी आणि नमन यादव या दोघांनी प्रत्येकी 2-2 विकेट्स मिळवल्या.

नेपाळची चाबूक सुरुवात

कुशल भुरटेल आणि आसिफ शेख या सलामी जोडीने 185 धावांचा पाठलाग करताना नेपाळला चांगली सुरुवात करुन दिली. या जोडीने पावरप्लेचा फायदा घेत नेपाळला आश्वासक सुरुवात करुन दिली. मात्र आसिफ नेपाळच्या 37 धावा असताना आऊट झाला. आसिफने 9 धावा करुन मैदानाबाहेरचा रस्ता धरला. त्यानंतर कुशलही बाद झाला. कुशलने 29 धावांचं योगदान दिलं.

रोहित आणि दीपेंद्रची निर्णायक भागीदारी

त्यानंतर दीपेंद्र सिंह आयरी आणि कॅप्टन रोहित पौडेल या दोघांनी धमाका केला. या जोडीने इंग्लंडच्या गोलंदाजीची धुलाई करत नेपाळच्या विजयाचा दावा मजबूत केला. मात्र निर्णायक क्षणी इंग्लंडने नेपाळला झटपट 2 झटके दिले. इंग्लंडने या सेट जोडीला आऊट केलं. दीपेंद्र 44 आणि रोहित 39 रन्स करुन माघारी परतले. त्यामुळे नेपाळच्या विजयाची आशा काही प्रमाणात कमी झाली. मात्र लोकेश बाम याने इंग्लंडचं टेन्शन वाढवलं.

लोकेश बामची झुंजार खेळी व्यर्थ

लोकेशने आरिफ शेख आणि गुलशन झा या दोघांच्या मदतीने किल्ला लढवला आणि नेपाळला शेवटपर्यंत सामन्यात कायम ठेवलं. लोकेशच्या या खेळीमुळेच इंग्लंडची पाचावर धारण झाली होती.

नेपाळला विजयासाठी 48 धावांची गरज असताना लोकेशने चाबूक बॅटिंग केली. नेपाळने 18 व्या षटकात 22 धावा केल्या. तर 19 व्या ओव्हरमध्ये 14 रन्स केल्या. लोकशेने केलेल्या फटकेबाजीमुळे सामना शेवटच्या ओव्हरपर्यंत पोहचला. नेपाळला आता 6 बॉलमध्ये 10 रन्स हव्या होत्या. मात्र सॅम करन याने अनुभवाच्या जोरावर शेवटच्या ओव्हरमध्ये फक्त 5 धावाच दिल्या. इंग्लंडने अशाप्रकारे 4 धावांनी सामना जिंकत विजयी सलामी दिली आणि उलटफेर होण्यापासून आपली लाज राखली.