पैसा, घर गेले आणि मातृछत्रही हरवले! शहीद पुत्राची २ कोटींची फसवणूक; धक्क्याने मातेचा मृत्यू

गडचिरोली:
नक्षलवाद्यांशी दोन हात करताना वीरमरण आलेल्या एका शहीद जवानाच्या कुटुंबावर आज दुःखाचा डोंगर कोसळला आहे. उपजिल्हाधिकारी पदाच्या नोकरीचे आमिष दाखवून एका भामट्याने शहीद पुत्राला तब्बल २ कोटी रुपयांना गंडा घातला. या फसवणुकीमुळे घरदार विकण्याची वेळ आली आणि या धक्क्याने शहीद जवानाच्या पत्नीचे (तरुणाच्या आईचे) निधन झाले. ही हृदयद्रावक घटना गडचिरोलीमध्ये उघडकीस आली आहे.

नेमकी घटना काय?
शहीद जवान गणपत मडावी यांचा मुलगा सागर गणपत मडावी हा स्पर्धा परीक्षेची तयारी करत होता. दरम्यान, त्याची ओळख ज्ञानेश्वर वारे (रा. पुणे) याच्याशी झाली. वारे याने स्वतःचे मोठे राजकीय संबंध असल्याचे सांगून सागरला 'उपजिल्हाधिकारी' किंवा 'पोलीस उपअधीक्षक' पदावर थेट नोकरी लावून देण्याचे आमिष दाखवले.

२ कोटींसाठी विकली जमीन आणि घर:
नोकरीच्या आमिषाला बळी पडून सागरने टप्प्याटप्प्याने तब्बल २ कोटी रुपये आरोपीला दिले. ही मोठी रक्कम उभी करण्यासाठी सागरने आपली वडिलोपार्जित शेती, राहते घर आणि आईचे दागिनेही विकले. मात्र, दोन वर्षे उलटूनही नोकरी मिळाली नाही आणि दिलेले पैसेही परत मिळाले नाहीत.

धक्क्याने आईचा मृत्यू:
आपली फसवणूक झाली असून आता डोक्यावर छप्परही उरले नाही, हे सत्य समोर आल्यावर सागरच्या आईला मोठा धक्का बसला. या विवंचनेत आणि मुलाच्या भविष्याच्या चिंतेत त्यांचा मृत्यू झाला. वडिलांच्या बलिदानानंतर आईचा आधार असलेल्या सागरने या फसवणुकीमुळे सर्वस्व गमावले आहे.

पोलिसांची 'सिनेस्टाईल' कारवाई:
सागर मडावी याने १९ एप्रिल रोजी गडचिरोली पोलीस ठाण्यात तक्रार दाखल केली. पोलिसांनी तातडीने चक्र फिरवून आरोपी ज्ञानेश्वर वारे याला पुण्यातील खराडी परिसरातून सिनेस्टाईल पाठलाग करून अटक केली आहे.

पोलीस आवाहन:
स्पर्धा परीक्षेची तयारी करणाऱ्या तरुणांनी कोणत्याही आमिषाला बळी पडू नये. सरकारी नोकरी ही केवळ गुणवत्तेवरच मिळते, पैसे देऊन नोकरी मिळत नाही, असे आवाहन गडचिरोली पोलिसांनी केले आहे. एका शहीद कुटुंबाची अशा प्रकारे झालेली फसवणूक पाहून संपूर्ण जिल्ह्यातून संताप व्यक्त होत आहे.