दौंडमध्ये वाढती गुन्हेगारी आणि अवैध शस्त्रांचा सुळसुळाट; पुणे ग्रामीण एलसीबीची मोठी कारवाई, दोन सराईत जेरबंद

दौंड: पुणे जिल्ह्यातील दौंड शहरात गेल्या काही दिवसांपासून गुन्हेगारीच्या घटनांमध्ये मोठी वाढ झाली असून, कायदा आणि सुव्यवस्थेचा प्रश्न गंभीर झाला आहे. या पार्श्वभूमीवर पुणे ग्रामीण स्थानिक गुन्हे अन्वेषण शाखेने (LCB) गुरुवारी मध्यरात्री मोठी कारवाई करत बेकायदेशीर पिस्तुलसह दोन सराईत गुन्हेगारांना अटक केली आहे.

नेमकी कारवाई काय?
मिळालेली माहिती अशी की, दौंडमधील हुतात्मा चौक रेल्वे ग्राउंड रोड परिसरात काही तरुण विनापरवाना घातक शस्त्रे घेऊन येणार असल्याची गोपनीय माहिती पोलिसांना मिळाली होती. या माहितीच्या आधारे स्थानिक गुन्हे शाखेने सापळा रचला. संशयास्पद हालचाली दिसताच पोलिसांनी झडती घेतली असता, त्यांच्याकडे ८० हजार रुपये किमतीचे एक स्टील बॉडीचे पिस्तूल आणि मॅक्झिन मिळून आले.

या कारवाईत पोलिसांनी इरफान उर्फ शेरखान शब्बीर खान (वय २२) आणि विशाल प्रकाश काटकर (वय ३०) या दोघांना अटक केली आहे. तर त्यांचा तिसरा साथीदार सोनू उर्फ बिल्ला उर्फ पद्माकर ताडे हा पसार झाला असून पोलीस त्याचा शोध घेत आहेत.

वाढत्या गुन्हेगारीमुळे नागरिक दहशतीखाली:
दौंड शहरात गुन्हेगारीने डोके वर काढले असून किरकोळ कारणावरून हाणामारी, प्राणघातक हल्ले आणि अवैध शस्त्रांचा वापर वाढला आहे. नुकत्याच झालेल्या 'हॉटेल जगदंबा' येथील सिलिंडर स्फोट प्रकरणात केवळ औपचारिक कारवाई झाल्याची टीका नागरिकांकडून होत आहे. तसेच, शहरातील सराईत गुन्हेगारांना राजकीय अभय मिळत असल्याचा आरोप करत, नागरिकांनी अशा गुंडांवर हद्दपारीची कडक कारवाई करण्याची मागणी केली आहे.

पोलिसांना नागरिकांचे आवाहन:
शहरातील परप्रांतीयांची वाढती संख्या आणि भाडेकरूंची अपुरी नोंदणी यामुळे गुन्हेगारांना लपण्यासाठी जागा मिळत आहे. त्यामुळे पोलिसांनी तातडीने भाडेकरू नोंदणी मोहीम राबवावी आणि प्रलंबित गुन्ह्यांचा तपास जलद गतीने करून शहरात शांतता प्रस्थापित करावी, अशी मागणी दौंडकरांनी केली आहे.