पुणे : नालेसफाईची निविदा ४२ टक्के बिलो; ११ कोटी पाण्यात?

पुणे - महापालिका (Pune Municipal) प्रशासनाने पावसाळ्यापूर्वी शहरातील नाले आणि पावसाळी गटारे साफ (Drainage Cleaning) करण्यासाठी तब्बल ११ कोटी रुपयांच्या २८ निविदा (Tender) मंजूर केल्या असून, आज त्यास प्रशासक विक्रम कुमार (Vikram Kumar) यांनी घेतलेल्या बैठकीत मान्यता देण्यात आली. यातील बहुतांशी महापालिकेने निश्‍चीत केलेल्या पूर्वगणनपत्रकापेक्षा ३५ टक्के ते ४२ टक्के कमी दराने आल्या आहेत. त्यामुळे या कामाचा दर्जा काय राहणार? असा प्रश्‍न यानिमित्ताने उपस्थित झाला आहे.

पावसाळ्यापूर्वी नाल्यांमधील कचरा, वाढलेले गवत यासह पाण्याच्या प्रवाहात येणारे अडथळे काढण्यासाठी निविदा काढली जाते. त्याचप्रमाणे शहरातील पावसाचे पाणी वाहून जाण्यासाठी पावसाळी गटारे टाकलेल्‍या असतात, त्यांची देखील सफाई करणे आवश्‍यक असते. महापालिकेवर प्रशासक आल्यानंतर वेळेत नालेसफाई करणार असे विक्रम कुमार यांनी स्पष्ट केले होते. महापालिकेने १५ क्षेत्रीय कार्यालयाच्या हद्दीतील नाले व पावसाळी गटारे साफ करण्यासाठी निविदा मागविल्या होत्या. त्यामध्ये नाले सफाइच्या १३ निविदा आणि पावसाळी गटारांच्या १५ निविदा स्थायी समितीसमोर मान्यतेसाठी आल्या होत्या. त्यास आज मान्यता देण्यात आली.

महापालिकेच्या अंदाजपत्रकात प्रत्येक क्षेत्रीय कार्यालयासाठी नाले सफाईसाठी सरासरी ७५ लाख रुपये तर पावसाळी गटारांच्या स्वच्छतेसाठी सरासरी ४९ लाख ५० हजार रुपयांची तरतूद करण्यात आली आहे. महापालिकेने मागविलेल्या निविदेत ही सर्वच कामे पूर्वगणनपत्रकापेक्षा ३५ ते ४२ टक्क्यांपर्यंत कमी दराने आल्या आहेत. त्या सर्व मान्य करण्यात आल्या आहेत.

तर केवळ भवानी पेठ क्षेत्रीय कार्यालयाची नाले सफाईची निविदा १० टक्के कमी दराने आली होती, त्यास आजच्या बैठकीत मान्यता देण्यात आलेली नाही.

३२ टक्के अनामत रक्कम

महापालिकेने निश्‍चीत केलेल्या दरापेक्षा कमी दराने निविदा आली असेल तर, निविदेच्या १० टक्के कमी दरापर्यंत एक टक्का रक्कम अनामत रक्कम म्हणून घेतली जाते. तर १० टक्क्याच्या पुढे प्रत्येक टक्क्यासाठी एक टक्का रक्कम घेतली जाते. त्यामुळे ज्या निविदा ३५ टक्के ते ४२ टक्क्यांपर्यंत कमी दराने आल्या आहेत. त्या ठेकेदाराकडून २५ ते ३२ टक्के रक्कम अनामत रक्कम म्हणून घेतली जाणार आहे, त्यामुळे त्यांना कामे व्यवस्थितच करावे लागतील असे प्रशासकीय सूत्रांनी सांगितले.

• जुन्या हद्दीसह समाविष्ट गावातील नाल्यांची लांबी - ६४७ किमी
• पावसाळी गटारी - १५० किमी
• चेंबर्सची संख्या - ३१०००
• नाले सफाईच्या निविदांची संख्या - १३
• पावसाळी गटारांच्या निविदेची संख्या - १५

• एकूण रक्कम -१०.८९ कोटी