पत्नीला जीवे मारण्याचा प्रयत्न केल्याप्रकरणी पतीला अटक

वालचंदनगर - पत्नीचा नॉयलॉनच्या दोरीने गळा आवळून जीवे मारण्याचा प्रयत्न  केल्याप्रकरणी पोलिसांनी शिंदेवाडी (ता.इंदापूर) येथील सुधाकर हरीभाऊ शिंदे (वय ३५) याच्यावर गुन्हा दाखल करुन अटक केली आहे.

याप्रकरणी लतिका सुधाकर शिंदे (वय ३२) हिने वालचंदनगर पोलिस ठाण्यात फिर्याद दिली आहे. वालचंदनगर पोलिसांनी दिलेल्या माहितीनूसार सोमवार (ता. २८) रोजी दुपारी बारा वाजण्याच्या सुमारास सुधाकर शिंदे हा जेवन करीत असताना आई चंद्रभागा हिने सुधाकर याला तुझे वडिल हरीभाऊ कामानिमित्त बाहेर चालले असून तू जेवन झाल्यानंतर शेतामध्ये मोटर चालू करण्यासाठी जाण्यासाठी सांगितले. यानंतर आरोपी सुधाकर म्हणाला की, मी बाहेर गेल्यानंतर तुम्हा दोघींना रान मोकळे होईल असे म्हणत चिडून जावून जेवन करता -करता उठून नायलॉनच्या दोरीने पत्नी लतिका चा गळा आवळून जीवे मारण्याचा प्रयत्न केला.

यावेळी हरीभाऊ शिंदे यांनी सुधाकर याला ढकलून देवून त्याच्या तावडीतून लतिकाची सुटका केली. यानंतर सुधाकर याने औषध फवारणीच्या पंपाचा पाईप घेवून आई चंद्रभागा हिच्या पायावरती व मांडीवरती तसेच वडिल हरीभाऊ यांनाही लाथा बुक्याने मारहाण केली. याप्रकरणी पोलिसांनी सुधाकर याच्यावर जीवे मारण्याचा गुन्हा दाखल केला असून तपास वालचंदनगर पोलिस ठाण्याचे साहय्यक पोलिस निरीक्षक बिरप्पा लातुरे यांच्या मार्गदर्शनाखाली साहय्यक फौजदार कसपटे करीत आहेत.