पुणे : अल्पवयीन मुलीवर विवाहित पुरुषाकडून लैंगिक अत्याचार; आरोपीला अटक

धायरी : नववीत शिकणाऱ्या अल्पवयीन मुलीवर एका तीस वर्षीय विवाहित नराधमाकडून वारंवार लैंगिक अत्याचार करण्यात आल्याची धक्कादायक घटना सिंहगड रस्ता परिसरात उघडकीस आली आहे. याप्रकरणी सिंहगड रोड पोलीस ठाण्यात बलात्कार आणि बाललैंगिक अत्याचार प्रतिबंधक कायद्यानुसार गुन्हा दाखल करण्यात आला असून पोलीसांनी आरोपीला अटक केली आहे. रामेश्वर हंगरगे (वय 30, रा.नऱ्हे) असे अटक करण्यात आलेल्या नराधमाचे नाव आहे.

             मिळालेल्या माहितीनुसार पीडित मुलीकडे ऑनलाईन शिक्षणासाठी असलेल्या मोबाईलचा क्रमांक मिळवून रामेश्वर हंगरगे याने मागील सुमारे वर्षभरापूर्वी ओळख वाढवली. त्यानंतर वारंवार त्या पीडित मुलीवर लैंगिक अत्याचार केले. याबाबत कोणाला काही सांगितले तर मुलीसह तिच्या आई-वडीलांना जीवे मारण्याची धमकी दिली. घाबरलेल्या मुलीने आपल्या वडिलांना याबाबत सांगितल्यानंतर त्यांनाही धक्का बसला. पीडित मुलीच्या वडिलांनी हा सर्व प्रकार ते ज्यांच्याकडे काम करतात त्यांना सांगितला. ते तात्काळ त्या पीडित मुलीला व तिच्या वडीलांना सिंहगड रोड पोलीस स्टेशन अंतर्गत असलेल्या नऱ्हे पोलीस चौकीत घेऊन गेले. तेथे पीडित मुलीच्या मुलीच्या फिर्यादीवरून दि. 20 मार्च 2022 रोजी रात्री उशिरा संबंधित नराधमावर गुन्हा दाखल करण्यात आला व त्यानंतर तातडीने कार्यवाही करत पोलीसांनी आरोपी रामेश्वर हंगरगे याला अटक केली. याबाबत पोलीस उपनिरीक्षक नितीन जाधव हे अधिक तपास करत आहेत.

या घटनेबाबत माहिती मिळताच मी तातडीने सिंहगड रोड पोलीस ठाण्याच्या प्रभारी अधिकाऱ्यांशी संपर्क साधून कारवाईबाबत माहिती घेतली व संबंधित आरोपीवर कठोर कारवाई करण्याच्या सूचना दिल्या आहेत. पोलीसांनी आरोपीला अटक केली आहे," अशी माहिती राज्य महिला आयोगाच्या अध्यक्षा रुपाली चाकणकर यांनी दिली आहे.

"आरोपी हा पीडित मुलीच्या ओळखीतील आहे. गुन्हा दाखल केल्यानंतर कोणताही विलंब न करता आरोपीला अटक करण्यात आली आहे. पुढील तपास करण्यात येत असून आरोपीला कठोर शिक्षा व्हावी यासाठी आम्ही प्रयत्न करत आहोत."

-युनुस शेख, वरिष्ठ पोलीस निरीक्षक, सिंहगड रोड पोलीस स्टेशन, पुणे शहर.