Pune : पुण्यातील नवले पुलावर भीषण अपघात; कोळसा वाहून नेणारा कंटेनर उलटला, वाहनांच्या ४ किलोमीटरपर्यंत रांगा

Pune Navle Bridge Accident: पुणे शहरात अपघातांची मालिका सुरूच आहे. पुणे-बंगळुरु महामार्गावरील नवले पुलाजवळ सोमवारी सकाळच्या सुमारास कोळशाने भरलेला कंटेनर भीषणअपघात झाला आहे. तीव्र उतारावर असताना चालकाचे कंटेनरवरील नियंत्रण सुटले आणि कंटेनर थेट डिव्हायडरला धडकून रस्त्यावर उलटला. सुदैवाने या घटनेत कोणतीही जीवितहानी झाली नाही.

अपघातात कंटेनरचालक किरकोळ जखमी झाला असून त्याला तातडीने उपचारासाठी रुग्णालयात दाखल करण्यात आलं आहे. रस्त्याच्या मध्यभागी कंटेनर उलटल्याने मोठी वाहतूक कोंडी झाली असून वाहनांच्या जवळपास ४ किलोमीटपर्यंतच्या रांगा लागल्या होत्या.

Ajit Pawar : एकनाथ शिंदेंना मोठा धक्का! अर्थमंत्री पद अजित पवार गटाकडे जाणार?

दरम्यान, अपघाताची माहिती मिळताच पोलिसांनी  तातडीने घटनास्थळी धाव घेत रस्त्यावर पडलेल्या कंटेनरला बाजूला करण्याचं काम सुरू केलं आहे. कंटेनरमध्ये ४० टन कोळसा असल्याने पोलिस आणि अग्निशमन दलाच्या कर्मचाऱ्यांना मोठी मेहनत घ्यावी लागत आहे.

प्राप्त माहितीनुसार, हा कंटेनर साताऱ्याकडून मुंबईच्या दिशेने कोळसा वाहून नेत होता. सकाळी साडेदहा वाजेच्या सुमारास कंटेनर नवले पुलावर आला असता, तीव्र उतारावर चालकाचे कंटेनरवरील नियंत्रण सुटले आणि कंटेनर थेट डिव्हायरला धडकला. कंटेरनचे ब्रेक फेल झाल्याने हा अपघात झाल्याची प्राथामिक माहिती आहे. पोलिसांकडून वाहतूक सुरळित करणाचे प्रयत्न सुरू आहेत.