Crime News: धक्कादायक! फरशीवर डोके आपटून सुनेचा खून, महिला दिना दिवशीच पुणे हादरले

Pune: आज ८ मार्च. जगभरात जागतिक महिला दिन मोठ्या उत्साहात साजरा केला जात असतानाच पुण्यात एक धक्कादायक घटना समोर आली आहे. घरकाम जमत नसल्याचा आरोप करुन सासूने सुनेचे डोके फरशीवर आपटून तिचा खून केल्याची धक्कादायक घटना पुण्यातील लोहगाव भागात घडली आहे. या प्रकरणी विमानतळ पोलिसांनी सासूला अटक केली आहे. महिला दिना दिवशीच या धक्कादायक घटनेने परिसरात खळबळ माजली आहे. 

याबाबत समोर आलेल्या माहितीनुसार, रितू रवींद्र माळवी (वय २८, रा. कलवड वस्ती, लोहगाव) असे मृत महिलेचे नाव असून तिला घरकाम करत नसल्याचा तसेच मुलाचा सांभाळ करत नसल्याने तिची सासू वारंवार छळ करत होती. काही दिवसांपूर्वी स्वयंपाकघरातील फ्रीज उघडताना रितूचा पाय लागल्याने वाद झाला होता. त्यावेळी रितूने सासूसोबत (कमला प्रभुलाल माळवी (वय ४९) वाद घातला. यावेळी कमलाने रितूला मारहाण केली. तिचे डोके फरशीवर आपटले. यामध्ये रितूचा जागीच मृत्यू झाला. या घटनेनंतर विमानतळ पोलिसांत तक्रार दाखल करण्यात आली असून पोलिस याबाबतचा अधिक तपास करत आहेत. महिला दिना दिवशीच समोर आलेल्या या घटनेने सर्वत्र खळबळ माजली आहे.