पुणे : कॉफीमध्ये गुंगीचे औषध देऊन बलात्कार; खराडीतील घटनेने खळबळ

पुणे : महाराष्ट्रात महिलांवरील अत्याचारांच्या घटना काही थांबण्याचं नाव घेत नाहीये. विद्येचं माहेरघर म्हणून ओळखल्या जाणाऱ्या पुणे शहरात एका विवाहित महिलेवर बलात्कार करण्यात आला आहे. आरोपीने व्यवसायात भागीदारी देण्याचं अमिष दाखवून महिलेला घरी बोलावून घेतलं. त्यानंतर कॉफीमधून गुंगीचं औधष देत महिलेवर बलात्कार केला. याप्रकरणी पीडित महिलेच्या फिर्यादीवरून पोलिसांनी गुन्हा दाखल करत आरोपीला अटक केली आहे. 

अजयसिंग विजयसिंग ठाकूर (वय ३१ वर्ष) असे अटक करण्यात आलेल्या आरोपीचे नाव आहे. पुण्यातील खराडी परिसरात ही संतापजनक घटना घडली आहे. पोलिसांनी दिलेल्या माहिती नुसार, आरोपीची कोरोनामुळे झालेल्या लॉकडाऊन मध्ये नोकरी गेली होती. दुसऱ्या नोकरीच्या शोधात असताना त्याची एका मित्रमार्फत तक्रारदार महिलेशी ओळख झाली.

फिर्यादी महिला केटरींगच्या व्यवसायात असल्यामुळे दोघांनीही हॉटेल सुरू करण्याचे ठरवले. दरम्यान यासंबंधी चर्चा करण्यासाठीच आरोपीने फिर्यादी महिलेला खराडी भागात घरी बोलावले होते. घरी आल्यानंतर आरोपीने महिला कॉफी मध्ये गुंगीचे औषध दिले. महिला बेशुद्ध पडल्यानंतर आरोपीने तिच्यावर बलात्कार केला.

दरम्यान, महिलेला शुद्ध आली तेव्हा तिच्या अंगावर कपडे नव्हते. आपल्यावर बलात्कार झाल्याचं लक्षात येताच तिने पोलिसांत धाव घेतली. याप्रकरणी महिलेने दिलेल्या फिर्यादीवरून चंदनगर पोलिसांनी आरोपी अजयसिंग विजयसिंग ठाकूर याच्यावर गुन्हा दाखल केला असून त्याला अटकही केली आहे. या घटनेनं परिसरात मोठी खळबळ उडाली आहे.