क्रिकेटपटू शिखर धवन पुन्हा लग्नाच्या बेडीत अडकला, युझवेंद्र चहलने सांगितलं की…

टीम इंडियाचा माजी क्रिकेटपटू शिखर धवनने पुन्हा एकदा नवी इनिंग सुरू केली आहे. यावेळी त्याने लेडी लव सोफीसोबत सात फेरे घेतले आहेत. गेल्या आठवड्यापासून सोशल मीडियावर शिखर धवन आणि सोफीच्या लग्नाची चर्चा सुरू होती. अखेर या दोघांचं लग्न थाटामाटात पार पडलं आहे. लग्नाच्या दिवशी शिखर धवन आणि सोफी व्हाइट आणि आयवरी थीमच्या आउटफीटमध्ये दिसले. दोघंही रॉयल कपल वाटत होते. शिखरने आपल्या लुकने सर्वांना आश्चर्याचा धक्का दिला. पांढऱ्या रंगाची एम्ब्रॉयडरी शेरवानी त्याने परिधान केली होती. तर डोक्यावर राजेशाही पगडी घातली होती. त्यामुळे त्याचा पेहराव एखाद्या राजकुमारासारखा वाटत होता. इतकंच काय तर गळ्यात पन्ना माळ घातली होती. त्यामुळे अधिक आकर्षक दिसत होता. दुसरीकडे, सोफीही एखाद्या परीसारखी दिसत होती. तिने फॅशन डिझायनर मनीष मल्होत्राच्या कलेक्शनमधील आयवरी आणि ऑरेंज रंगाची 3डी फुलांनी सजलेला लहंगा परिधान केला होता. मोत्याने भरतकाम केलेला ब्लाउज, काउल टॅसल आणि जुळणारा हेड वेल सोबत होता.

भारतीय क्रिकेट संघाचा फिरकी गोलंदाज युजवेंद्र चहल देखील लग्नाला उपस्थित होता. शिखर धवन आणि सोफीच्या लग्नाची बातमी क्रिकेटपटू युजवेंद्र चहलने सोशल मीडियावर दिली आहे. त्याने स्वतः नाचत असलेला व्हिडिओ शेअर केला आहे. चहलने पोस्टमध्ये धवन आणि सोफीचे फोटो शेअर केले आहेत.  तसेच शिखर धवनसाठी एक खास संदेश देखील लिहिला. पोस्ट शेअर करताना चहलने लिहिले की, “माझ्या मित्राचे लग्न आहे.”

शिखर धवनचे हे दुसरं लग्न आहे. यापूर्वी 2012 मध्ये त्याने 10 वर्षांनी मोठ्या असलेल्या आयेशा मुखर्जीसोबत लग्नगाठ बांधली होती. त्यानंतर 2023 मध्ये दोघंही विभक्त झाले. या दोघांना एक मुलगा असून तो आयेशासोबत असतो. असं असताना शिखर धवनची सोफीसोबत मैत्री झाली आणि त्या मैत्रीचं रुपांतर प्रेमात झालं. काही वर्षे एकमेकांना समजून घेतल्यानंतर अखेर लग्नबंधनात अडकले आहेत. सोफी ही आयर्लंडमध्ये राहणारी असून प्रोडक्य कंसल्टेंट आहे. तसेच शिखर धवनपेक्षा वयाने 5 वर्षे लहान आहे.