पुणे: शहर बंद करून दाखवाच ; महापौर मंजुषा नागपुरे यांचे आमदार रोहित पवार यांना थेट आव्हान

पुणे: विद्येचे माहेरघर असून राज्यभरातून लाखो विद्यार्थी येथे आपले करिअर घडवण्यासाठी आणि उच्च शिक्षणासाठी येतात. मात्र, विद्यार्थ्यांच्या प्रश्नांचे राजकीय भांडवल करून कोणी शहराला वेठीस धरण्याचा प्रयत्न करत असेल, तर पुणेकर ते कधीही सहन करणार नाहीत. आमदार रोहित पवार यांनी हिंमत असेल तर पुणे शहर बंद पाडून दाखवावेच, मग त्यांना कळेल की पुणेकर नेमके काय आहेत, अशा शब्दांत पुण्याच्या महापौर मंजुषा नागपुरे यांनी आमदार रोहित पवार यांना थेट आणि आक्रमक आव्हान दिले आहे.

महापौर मंजुषा नागपुरे यांनी प्रसारमाध्यमांशी बोलताना स्पष्ट शब्दांत आपली भूमिका मांडली. त्या म्हणाल्या की, "पुण्यात गेल्या काही दिवसांपासून विविध राजकीय मुद्द्यांवरून आणि आंदोलनावरून वातावरण तापले आहे. शांततापूर्ण मार्गाने आंदोलन करणे हा लोकशाहीचा अधिकार आणि भाग असला, तरी सामान्य नागरिकांना वेठीस धरून, वाहतूक व्यवस्था कोलमडून आणि दैनंदिन जनजीवन विस्कळीत करून विद्यार्थ्यांचे भले कधीही साध्य होणार नाही. आमदार रोहित पवार यांनी पुणे बंदची हाक दिली आहे, परंतु त्यांनी हे लक्षात ठेवावे की पुणेकर काय आहेत हे त्यांना अशा फुटकळ आंदोलनांतून नक्कीच समजावून सागू. इथून पुढे पुणेकर नागरिकांच्या आणि शहराच्या विरोधातील कोणतेही राजकीय आंदोलन किंवा शहराची कोंडी अजिबात सहन करणार नाही, आणि आम्ही पुणे शहर कोणत्याही परिस्थितीत बंद पडू देणार नाही."

यावेळी विद्यार्थ्यांनी राजकीय नेत्यांच्या भूलथापांना बळी पडू नये, असे भावनिक व कडक आवाहन त्यांनी केले. त्या म्हणाल्या की, राज्यभरातील पालक अत्यंत कष्ट करून, रक्ताचे पाणी करून आपल्या मुलांना उच्च शिक्षणासाठी पुण्यात पाठवतात. त्यामुळे विद्यार्थ्यांनी अशा राजकीय नेत्यांच्या नादी लागून स्वतःचे उज्ज्वल भवितव्य धोक्यात घालू नये. काही ठराविक नेत्यांच्या राजकीय पोळ्या भाजण्यासाठी आणि स्वार्थासाठी विद्यार्थ्यांनी रस्त्यावर उतरून स्वतःचे नुकसान करून घेऊ नये, तर विद्यार्थ्यांनी केवळ आपल्या अभ्यासावर आणि भविष्यातील करिअरवर पूर्ण लक्ष केंद्रित केले पाहिजे, असा सल्लाही त्यांनी दिला.

नेमका वाद काय आहे?

दरम्यान, एमपीएससीचे अध्यक्ष डॉ. विवेक भिमनवार यांच्या राजीनाम्यावरून आणि स्पर्धा परीक्षांच्या विविध मुद्यांवरून राष्ट्रवादी काँग्रेस शरदचंद्र पवार पक्षाचे युवा आमदार रोहित पवार यांनी राज्य सरकारवर जोरदार निशाणा साधला होता. पेपरफुटीच्या आणि कारभारातील अनियमिततेच्या प्रकरणातून स्वतःची पाठराखण करण्यासाठी व अंग काढून घेण्यासाठी सरकारने अध्यक्षांवर दबाव वाढवत हा राजीनामा घेल्याचे आरोप त्यांनी केले होते. तसेच जर राज्य मंत्रिमंडळाच्या बैठकीत विद्यार्थ्यांच्या हिताचा योग्य निर्णय झाला नाही, तर आम्ही तीव्र आंदोलन पुकारून पुणे शहर पूर्णपणे बंद पाडू, असा सज्जड इशारा आमदार रोहित पवार यांनी सरकारला दिला होता.

रोहित पवार यांच्या याच इशाऱ्याला पुण्याच्या महापौर मंजुषा नागपुरे यांनी अत्यंत आक्रमक भाषेत प्रत्युत्तर दिले असून, महायुती आणि विरोधकांमधील हा कलह आता चांगलाच पेटला आहे. या राजकीय संघर्षामुळे आगामी काळात पुण्यातील वातावरण आणखी तापण्याची शक्यता वर्तवली जात आहे.